Të apasionuar pas historisë/ Fluks vizitorësh në kështjella, muze dhe parqet arkeologjike – Turisti spanjoll: Po “bie në dashuri” me Shqipërinë!

Turizmi kulturor në Shqipëri vazhdon të shënojë rritje. Përveç plazheve në jug të vendit, të shumtë janë turistët që kanë zgjedhur për të vizituar Krujën, Shkodrën, Beratin, Gjirokastrën, Tiranën e Durrësin.

Kështjellat, muzetë, parqe arkeologjike në vendin tonë “kanë gjithnjë një tjetër histori për të treguar”..

Por kjo histori bëhet më e bukur, ku thuhet nga vetë të huaj, të cilët kanë lënë kohë për të t’u ngjitur   majave të qyteteve e për të vizituar kështu kalatë, më pas për “të rendur” në brendinë e tyre (të qyteteve) për t’u njohur me bukuritë dhe arkitekturën e hershme, të ruajtur me fanatizëm deri më sot..

“Kalaja e Krujës është shumë mbresëlënëse, dhe pamja prej asaj një mrekulli. Po bie në dashuri me këtë vend”. Kështu shprehet Nacho Madrigali nga Spanja teksa viziton Krujën me familjen e tij.

“Përshëndetje quhem Nacho Madrigali, nga Spanja. Punoj si pilot në linjën “Blue Panorama”,  kryesisht në fluturime nga Tirana drejt destinacioneve kryesore në Itali. Kontrata jonë zgjaste deri në fund të shtatorit, por për shkak të numrit të madh të pasagjerëve do të qëndroj këtu deri në fund të tetorit. Sot po vizitoj Kështjellën e Krujës, e cila është një kështjellë shumë e bukur dhe mikpritëse. Për mua pjesa më mbresëlënëse është vizita në pjesën e sipërme të Kalasë. Unë po bie në dashuri me këtë vend”, shprehet Nacho Madrigali.

Të tjerë turistë kanë zgjedhur të vizitojnë Kalanë e Shkodrës, por që tregojnë se vizita e tyre do të vijojë në Tiranë, Berat dhe Gjirokastër. Merilyn dhe Dan janë dy turistë të rinj në moshë, të apasionuar pas historisë. Ata kanë zgjedhur Kalanë e Shkodrës për të nisur udhëtimin e tyre nëpër Shqipëri. Kalaja e Shkodrës iu ka pëlqyer shumë, madje iu ka lënë mbresa të veçanta mikpritja, kultura dhe natyra e vendit tonë.

 “Jemi këtu për shkak të historisë së Shqipërisë. Ne të dy nuk kemi lexuar mjaftueshëm për historinë e Ballkanit. Kështu që menduam të shkonim në Shqipëri dhe ja ku jemi. Kjo është praktikisht ajo që po bëjmë. Kemi kaluar nga qyteti në qytet kemi qëndruar në hostel, duke shijuar mikpritjen e Shqipërisë, kulturën natyrën. Deri tani udhëtimi ka shkuar shumë mirë. Kemi parë kalanë e Shkodrës dhe me të vërtetë na pëlqeu, është një kala shume  e madhe. Ju nuk mund ta shikoni se është mbrapa kamerës, por është një pamje shume e bukur nga kalaja. Gjithashtu duam të shohim Tiranën, Beratin dhe Gjirokastrën për shkak të historisë së këtyre vendeve. Në bazë të këtij itinerari ne do të kalojmë përmes Shqipërisë dhe mesa duket do të shohim të gjithë vendin”, shprehen Merilyn dhe Dan.

Numri i turistëve që kanë vizituar kalatë e qyteteve kryesore në vend është rritur në 6 mujorin e parë të këtij viti. Konkretisht, Muzeu Historik Kombëtar “Gjergj Kastrioti Skënderbeu” dhe Muzeu Etnografik i Krujës janë nga më të vizituarit në Shqipëri.

Sipas të dhënave të fundit të Ministrisë së Kulturës vetëm për 6-mujorin e parë të vitit këto dy muze i kanë vizituar rreth 15 mijë turistë..

Osman Dedja/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.