Të ardhurat e ulëta nga dividenti – Tatimet bëjnë njoftimin e fundit për biznesin
Të ardhurat në buxhetin e shtetit nga dividenti janë aktualisht të ulëta në raport me planin vjetor të Ministrisë së Financave. Referuar të dhënave zyrtare të këtij dikasteri, aktualisht për 7 mujorin janë arkëtuar nga kjo taksë vetëm 132 milionë lekë, nga 800 milionë lekë që është plani për gjithë vitin, ose e thënë ndryshe vetëm 17 % e tij.
Por krahasuar me te njëjtën periudhë të një viti më parë, kjo vlerë është e lartë, pasi në 2016 u arkëtuan vetëm 23 milionë lekë, nga 1 miliardë që ishte plani për gjithë vitin. Por nisur edhe nga niveli i ulët i arkëtimit të kësaj takse, administrata tatimore ka bërë dhe njoftimin e fundit, sipas të cilit çdo person juridik, duhet të deklarojë dhe të paguajë për llogari të administratës tatimore, tatimin mbi dividendin e pagueshëm, brenda datës 21 Gusht të vitit 2017.
“Sqarojmë se pavarësisht nga koha kur kryhet pagesa e dividendëve për përfituesit, pagesa e tatimit mbi dividentin është detyrim i pavarur nga fakti nëse është bërë ose jo shpërndarja e tij. Mosrespektimi i këtij afati është i dënueshëm administrativisht, sipas penaliteteve të zbatueshme bazuar në ligj”, thuhet në njoftimin zyrtar të Administratës Tatimore.
Violeta Shqalsi/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.