Të ardhurat “kapërcejnë” planifikimin – T1, realizohen në masën 101%, shpenzimet arrijnë deri në 96%
Të ardhurat e qeverisë shqiptare gjatë tremujorit të parë të këtij viti kanë prekur shifrën e 108 mld lekëve, me një realizim në masën 101% krahasuar me planin vjetor, tregojnë shifrat zyrtare nga Ministria e Financave. Krahasuar me të njëjtën periudhë të një viti më parë, totali i të ardhurave në buxhet rezulton 4.25% më i lartë.
Të ardhurat doganore u realizuan në vlerën 38.3 miliardë lekë, 3.5 miliardë lekë ose 10.1% më shumë se 3 mujori 2020, si dhe 1 miliardë lekë ose 2.7% më shumë se plani i të ardhurave doganore për 3 mujorin e vitit 2021.
Të ardhurat nga akciza janë realizuar në masën 10.3 miliardë lekë, 132 milionë lekë ose 1.3% më shumë se viti 2020, si dhe 1.4 miliardë lekë ose 15.3% më shumë se plani i akcizës për 3 mujorin 2021. Ndikim të rëndësishëm në të ardhurat nga akciza ka pasur produkti karburant importi, me një rritje 9 mijë ton (+8%) me një efekt +421 milionë lekë më shumë se viti i kaluar. Ndër produktet e akcizueshme që kishin ndikim negativ, ishte produkti cigare me një rënie prej 60 ton (-9.1%) krahasuar me një vit më parë, duke sjellë një efekt negative në akcizë me -270 milionë lekë.
Të ardhurat tatimore për 3 mujorin 2021 u realizuan në masën 59.7 miliardë lekë, 1.1 miliardë ose 1.9% më shumë se 3 mujori i vitit të kaluar, si dhe 554 milionë lekë, ose 0.9% më shumë se plani i 3 mujorit 2021.
Ajo që bie në sy ndërkohë është treguesi it ë ardhurave nga tatimi mbi fitimin. Të ardhurat e mbledhura nga tatimi mbi fitimin u realizuan në masën 10.6 miliardë lekë 1.5 miliardë lekë, ose 16.4% më shumë se 3 mujori 2020, si dhe 2.3 miliardë lekë ose 28.3% më shumë se plani 2021 për Tatimin mbi Fitimin. Tatimi mbi të ardhurat personale është arkëtuar në vlerën 10.1 miliardë lekë, 1.6 miliardë lekë ose 19.2% më shumë se 3 mujori 2020, si dhe 978 milionë ose 10.7% më shumë se plani 3 mujor 2021.
Sa i përket shpenzimeve, ato rezultojnë në 115 mld lekë, me një masë realizimi në 96% krahasuar me planin si dhe në rritje me 8.2% krahasuar me të njëjtën periudhë të vitit të kaluar. Shpenzimet kapitale fiksohen në rreth 11 miliardë lekë deri në fund të marsit. Fondi i rindërtimit ndërkohë ka kanalizuar rreth 2.9 mld lekë, me një masë realizimi në 11% nga parashikimi i këtij viti, dhe me një rritje të ndjeshme gjatë marsit. Në muajin shkurt bëhej fjalë për rreth 900 milionë lekë. Në përputhje me parashikimet buxhetore dhe të indikatorëve makroekonomikë, niveli i deficitit në muajin e tretë të vitit 2021 rezultoi në rreth 7 miliardë lekë.
Roel Korkuti / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.