Të ardhurat nga turizmi – Arrijnë vlerën rekord prej 782 milionë eurosh në tremujorin III

Të ardhurat e ekonomisë shqiptare nga turizmi shënuan një rekord të ri në tremujorin e tretë të vitit. Sipas Bankës së Shqipërisë, turistët e huaj shpenzuan 782 milionë euro në tre muaj, shifra më e lartë e regjistruar ndonjëherë në statistikat zyrtare të bilancit të pagesave. Kjo i ka çuar të ardhurat nga turizmi për 9-mujorin e këtij viti në rreth 1.64 miliardë euro, edhe ky një rekord historik.

Turizmi hyrës në Shqipëri po rritet me ritme të larta në vitet e fundit. Mbështetur në statistikat zyrtare, për 10 muajt e këtij viti Shqipërinë e vizituan 5.85 milionë shtetas të huaj, në rritje me më shumë se 8% krahasuar me vitin e kaluar. Rritja e numrit të turistëve po sjell edhe rritje të shpenzimeve të tyre gjatë udhëtimeve në Shqipëri, me përfitime të konsiderueshme për ekonominë shqiptare.

Flukset gjithnjë e në rritje të të ardhurave nga turizmi po luajnë një rol amortizues në deficitin tregtar të vendit, që këtë vit është rritur ndjeshëm, sidomos për shkak të përmbysjes së bilancit të këmbimeve të energjisë elektrike. Të ardhurat nga turizmi, sidomos në tremujorin e tretë të vitit, vlerësohet se kanë edhe një ndikim të konsiderueshëm në kursin e këmbimit mes euros dhe lekut. Sipas Bankës së Shqipërisë, kursi mesatar euro-lek gjatë tremujorit të tretë të këtij viti rezultoi 121.6 lekë, me një nënçmim prej 1.2% krahasuar me tremujorin e dytë.

Edhe po ta llogarisim në terma neto, duke zbritur shpenzimet e shqiptarëve jashtë vendit, bilanci i sezonit turistik këtë vit është në përmirësim të ndjeshëm. Të ardhurat neto në bilancin e pagesave në zërin udhëtime për nëntë muaj arritën në 412 milionë euro, me një rritje prej 15% krahasuar me vitin e kaluar.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.