Të ardhurat nga turizmi në 2016, Rama: Mbi 1 mld e 200 milionë euro. Kemi potencialin për të shkuar në 5 mld në vit
Kryeministri Rama gjatë paradites së sotme ka zhvilluar një bashkëbisedim për zhvillimin e sektorit të turizmit. Gjatë fjalës së tij Rama pohoi se të ardhurat nga turizmi vitin e kaluar u rritën në mbi 1 mld e 200 milionë Euro, ndërkohë sipas tij potenciali është për të shkuar në 5 miliardë në një vit.
“Të ardhurat nga turizmi u rritën mbi 1 miliard e 200 milionë Euro. Kemi potencial për te shkuar 5 miliardë në vit”.
Po ashtu Rama foli edhe për rritjen e numrit të vizitorëve gjatë vitit të kaluar.
“Në turizmin kulturor kemi rritje me 17.5 për qind të vizitorëve. Ata konsumojnë, flenë, kalojnë kohë në qytete, në këto pika që kanë të bëjnë me programin tonë të Rilindjes Urbane, prandaj ripërtëritja e këtyre qyteteve është ekonomi. Këtë vit do të ketë edhe më shumë. Ka filluar promocioni për Shqipërisë. Vitin e kaluar kishim rritje të fluturimeve direkte me Charter. Kishim rritje me 30 për qind të udhëtimeve me krocera. Këtë vit do të kemi bum vizitorësh. Na duhet të bëjmë më shumë investime për të bërë resorte të cilësisë së lartë. Sot kemi 693 agjenci që janë të certifikuara dhe që operojnë në vend”, tha kryeministri Rama.
Kreu i kabinetit qeveritar ndër të tjera pohoi se këtë vit ka pasur një rritje të turistëve në Valbonë dhe Tamarë.
“Është rritur numri i vizitorëve që shkojnë në Valbonë në fundjavë. E njëjta gjë ka ndodhur edhe në Tamarë, ndërkohë që ka filluar ndërtimi i bujtinave të reja. Me Thethin na duhet të bëjmë rrugën për të shtuar numrin e vizitorëve”, pohoi ai
Në këtë bashkëbisedim Rama foli edhe për një muze nënujor, ku tha se: “Duam të bëjmë një muze nënujor me skulpturat e realizmit socialist. Ky muze të vizitohet vetëm duke u zhytur!” , u shpreh kryeministri Rama në bashkëbisedimin për zhvillimin e sektorit të turizmit
Osman Dedja/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.