Të ardhurat nga turizmi në rritje edhe për tremujorin e parë 2017
Të ardhurat nga turizmi u rritën sërish në tremujorin e parë të këtij viti. Sipas të dhënave nga Banka e Shqipërisë, të ardhurat nga udhëtimet në bilancin e pagesave prekën vlerën e 301 milionë eurove, në rritje me 6.3% krahasuar me tremujorin e parë të vitit të kaluar.
Fillimi i vitit nuk është periudha më intensive në aktivitetin turistik, megjithatë tendenca në rritje vërehet edhe nga të dhënat mbi hyrjet e shtetasve të huaj në Shqipëri.
Sipas Institutit të Statistikave, për periudhën janar-prill në Shqipëri kanë hyrë rreth 943 mijë shtetas të huaj, 13% më shumë krahasuar me të njëjtën periudhë të vitit të kaluar.
Të ardhurat nga turizmi po shfaqin një tendencë në rritje gjatë viteve të fundit, ndërsa për vitin e kaluar arritën shifrën rekord të 1.5 miliardë eurove.
Megjithatë, në rritje paraqiten edhe shpenzimet e shqiptarëve për udhëtime jashtë vendit, që janë treguesi kryesor i tërthortë për sa i takon turizmit dalës.
Sipas Bankës së Shqipërisë, në tremujorin e parë të vitit shqiptarët shpenzuan 216 milionë euro, në rritje me 4.6% kundrejt të njëjtës periudhë të një viti më parë.
Gjithnjë sipas Instat, daljet e shtetaseve shqiptarë jashtë vendit për katër muajt e parë të vitit janë rritur lehtë, me 5.8% krahasuar me të njëjtën periudhë të një viti më parë.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.