Të ardhurat nga TVSH – 3-mujori, 1.3 miliard lekë më shumë se në vitin 2016
Fillimi i këtij viti duket se është i mbarë duke iu referuar të dhënave mbi të ardhurat nga Tatimi mbi Vlerën e Shtuar. Kjo pasi mosrealizimi më i madh nga administrata fiskale për vitin e kaluar ka ardhur nga Tatimi i Vlerës së Shtuar, duke dhënë një ndikim negativ në treguesit fiskalë të kësaj periudhe.
Sipas statistikave të Ministrisë së Financave, të ardhurat nga TVSH-ja janë për tre muajt e parë të vitit janë realizuar në vlerën 31.3 miliardë lekë, ose 166 milion me shume se plani, ndërkohë që janë 1.3 miliardë lekë më shumë se një vit më parë, ose 4.6 % më shumë.
Një ndër faktorët që mund të ketë ndikuar në të ardhurat e këtij zëri mund të jetë ndërgjegjësimi i biznesit dhe formalizimi i transaksioneve.
Por sipas Deputetit Ervin Bushati, rritja e të ardhurave nga TVSH-ja ka ardhur edhe si rezultat i rritjes së konsumit.
“Kemi një përmirësim të ndjeshëm të ekonomisë. Ritmet e zhvillimit ekonomik janë për t’u përshëndetur, reformat e kanë dhënë efektin dhe kanë qenë reformat kryesisht prorogativa e këtij zhvillimi ekonomik. Në raportin e Fitch kishte dy momente shumë pozitive që unë mendoj se vërehen për herë të parë në ekonominë shqiptare.
E para është që një drejtues apo kapital zhvillimor i ekonomisë është më në fund konsumi i brendshëm, i cili për herë të para ka një rezultat pozitiv aq sa të ndikojë dhe zhvillimin ekonomik.
E dyta është që Shqipëria gjithmonë e më shumë po largohet nga ndikimet ciklike apo gjeografike të partnerëve më të rëndësishëm tregtarë si Greqia dhe Italia.
Të dyja këto zhvillime për herë të parë tregojnë që ekonomia shqiptare ka kaluar në një fazë të re zhvillimi ekonomik: ku është më e pavarur nga ndikimet e fqinjëve dhe konsumi i brendshëm më në fund është një motor zhvillimi dhe nuk ndikohet më ekonomia vetëm nga investimet e huaja“, u shpreh Bushati për SCAN.
Po sipas statistikave të Ministrisë së Financave, të ardhurat nga TVSH-ja në import janë realizuar në vlerën 22 miliard lekë, 4.9% ose 1 miliard lekë më shumë se 3-mujori i vitit 2016 dhe 4.7% ose 987 milion lekë më shumë se plani.
Të ardhurat nga TVSH-ja brenda vendit janë realizuar në vlerën 9.2 miliard lekë, 4.1% ose 362 milion lekë më shumë se 3 mujori i vitit 2016 dhe me një realizim të planit të periudhës në masën 91.8%.
Faktor pozitiv që ka ndikuar në këtë rezultat ka qenë rritja e prodhimit vendas të energjisë elektrike dhe karburantit ndërkohë që krahasuar me 3 mujorin 2016, rimbursimi i TVSH është rritur 14%.
Violeta Shqalsi/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.