Të ardhurat nga TVSH në 9 muaj – 5.7 miliard lekë më shumë se në vitin 2016

Të ardhurat nga taksa e TVSH, që njihet ndryshe edhe si takse e konsumit, kanë ardhur në rritje këtë vit. Sipas statistikave zyrtare të Ministrisë së Financave, të ardhurat nga TVSH-ja janë  për 9 mujorin  janë realizuar në vlerën 101.9 miliardë lekë, ndërkohë që janë 5.7 miliardë lekë më shumë se një vit më parë.

Kështu në të njëjtën periudhë të një viti më parë mbledhja e të ardhurave nga kjo taksë  rezultonte në vlerën e 96.2 miliardë lekëve.

Po sipas këtyre të dhënave nga Financat, të ardhurat nga TVSH-ja në import janë realizuar në vlerën 75.6 miliard lekë, 6% ose rreth 4.3 miliard lekë  më shumë se 9 mujori i vitit 2016 dhe rreth 459 milion lekë më shumë se plani.

Rritja e prodhimit vendas të karburantit ka ulur importin e këtij produkti dhe si rrjedhojë, të ardhurat nga TVSH- ja në import. Karburanti prodhim vendas mbuloi rreth 30.8% të konsumit gjatë 9 mujorit të vitit 2017 krahasuar me 1.5% që ishte ky tregues vitin e kaluar.

Ndërsa të ardhurat nga TVSH-ja brenda vendit janë realizuar në vlerën 26.3 miliard lekë, 5.5% ose 1.4 miliard lekë më shumë se 9 mujori i vitit 2016 dhe me një realizim të planit të periudhës në masën 99.6%.

Rimbursimi i TVSH është realizuar në vlerën 9 miliard lekë, rreth 2.6 miliard lekë ose 39.7% më shumë se 9 mujori i vitit 2016.

Por duke analizuar  të ardhurat nga ky zë mund të përmendim që një ndër faktorët që mund të ketë ndikuar në të ardhurat e këtij zëri mund të jetë ndërgjegjësimi i biznesit dhe formalizimi i transaksioneve, por nuk mund të lihet pa përmendur edhe kontrollet e tatimeve sidomos ato të përqendruara në zonat bregdetare, ku dhe aktiviteti ekonomik këto muajt e fundit është i lartë.

Violeta Shqalsi/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.