Të ardhurat nga TVSH – Në Shkurt, 600 milionë lekë më shumë se në 2016

Fillimi i këtij viti duket se është i mbarë duke iu referuar të dhënave mbi të ardhurat nga Tatimi mbi Vlerën e Shtuar. Kjo pasi mosrealizimi më i madh nga administrata fiskale për vitin e kaluar ka ardhur nga Tatimi i Vlerës së Shtuar, duke dhënë një ndikim negativ në treguesit fiskalë të  kësaj periudhe.

Sipas statistikave të Ministrisë së Financave, të ardhurat nga TVSH-ja janë për dy muajt e parë të vitit janë realizuar në vlerën 20.2 miliardë lekë, nga 19.6 miliardë lekë që ishte në të njëjtën periudhë të një viti më parë.

Një ndër faktorët që mund të ketë ndikuar në të ardhurat e këtij zëri  mund të jetë ndërgjegjësimi i biznesit dhe formalizimi i transaksioneve. Po sipas të dhënave zyrtare të Ministrisë së Financave, të ardhurat nga TVSH-ja në import  janë realizuar në vlerën 13.1 miliard lekë, 0.2% ose 35 milion lekë më shumë se 2 mujori i vitit 2016 dhe 4.8% ose 599 milion lekë më shumë se plani.

Të ardhurat nga TVSH-ja brenda vendit janë realizuar në vlerën 7.1 miliard lekë, 5% ose 340 milion lekë më shumë se 2 mujori i vitit 2016 dhe me një realizim të planit të periudhës në masën 92.2%. Sipas analizës së specialistëve të financave, një ndër faktorët që  ka ndikuar në këtë rezultat ka qenë rritja e prodhimit vendas të energjisë elektrike dhe karburantit.

Tatimi mbi Vlerën e Shtuar (TVSH)  është taksë që zbatohet ndaj mallrave dhe shërbimeve brenda territorit të Shqipërisë.

Violeta Shqalsi/SCAN 

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.