Të ardhurat nga vendorët  – 10 mujori, 3.2 miliardë lekë më shumë se 2016

Reformat e ndërmarra, sidomos ajo administrative-territoriale apo rritja e disa tarifave nga bashkitë të ndryshme kanë dhënë efektet e pritshme.

Njësitë administrative lokale tashmë i janë kthyer një trendi rritës në mbledhjen e të ardhurave  si në buxhetet e tyre, ashtu edhe për ato  që kalojnë në buxhetin e shtetit. Referuar të dhënave të treguesve fiskalë të Ministrisë së Financave, rezulton se gjatë 10-mujorit të këtij viti janë mbledhur rreth  16.2 miliardë lekë ose 3.2 miliardë lekë më tepër sesa e njëjta periudhë e një viti më parë.

Ndërsa  duke i krahasuar me planin vjetor rezulton se  gjatë kësaj periudhë  janë realizuar mbi 94 % e planifikimit. Sipas statistikave zyrtare të financave,  në 10 mujorin e vitit 2016, në buxhetin e shtetit janë arkëtuar nga pushteti vendor 13 miliardë lekë.

Aktualisht, taksat e pushtetit vendor, të ardhurat e të cilave shkojnë në buxhetin e shtetit, janë ato mbi pasurinë, nga e cila janë mbledhur 4.2 miliardë lekë, tatimi mbi biznesin e vogël në vlerën 272 milion lekë dhe nga  taksa lokale janë mbledhur 11.7 miliardë lekë.

Por në gjithë këto vite njësitë e qeverisjes vendore nuk kanë administruar  në mënyrë efikase, çka është reflektuar  në treguesit e të ardhurave. Por referuar të dhënave të këtij viti mund  të vërejmë  se mund të këtë patur edhe një parashikim më të ulët se kapaciteti.

Violeta Shqalsi/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.