Të ardhurat personale, Tatimet kujtojnë qytetarët për afatin: Deklarimi deri në 2 Maj. Procedura, si duhet të veproni
Drejtoria e Përgjithshme e Tatime përmes një njoftimi kujton afatin për deklarimin individual të të ardhurave. Konkretisht, DPT në këtë njoftim riktheksohet se afati i fundit për deklarimin individual vjetor të të ardhurave është data 2 Maj.
“Deklarata duhet plotësuar dhe dorëzuar elektronikisht nga individët që përfitojnë të ardhura vjetore, me burim në Republikën e Shqipërisë dhe jashtë saj, në shumën mbi 2,000,000 (dy milionë) lekë. Për më shumë informacion vizitoni faqen tonë zyrtare www.tatime.gov.al, rubrika Individët. Për çdo paqartësi mund të drejtoheni pranë zyrave të shërbimit të tatimpaguesve, të kontaktoni në numrin pa pagesë 0800 00 02 të Qendrës së Thirrjeve ose të kërkoni asistencë përmes dritares së ndihmës Livechat në faqen tonë zyrtare” thuhet në njoftimin e DPT-së.
Kështu individët rezidentë, që realizojnë të ardhura të tatueshme në territorin e Republikës së Shqipërisë dhe jashtë saj, në shumën mbi 2,000,000 (dy milionë) lekë, detyrohen të plotësojnë dhe të dorëzojnë Deklaratën Individuale Vjetore të të Ardhurave.
Gjithashtu, individët jo rezidentë, që realizojnë të ardhura të tatueshme me burim në Republikën e Shqipërisë, në shumën mbi 2,000,000 (dy milionë) detyrohen të dorëzojnë deklaratën vjetore të të ardhurave.
Individët janë të detyruar të deklarojnë:
Të ardhura bruto nga paga apo shpërblimet nga marrëdhëniet e punësimit të individit.
Të ardhurat bruto nga dividenti për pjesëmarrje në shoqëri tregtare apo nga veprimtaritë e biznesit.
Të ardhurat bruto nga qiraja dhe fitimet kapitale nga shitja e pasurisë së paluajtshme, në pronësi të deklaruesit.
Të ardhurat bruto nga interesa bankarë.
Fitimi kapital neto, i krijuar nga investimet në tituj apo në pasuri të paluajtshme;
Shuma bruto të fituara nga lotari apo lojëra të tjera të fatit;
Të ardhurat bruto nga pasuria intelektuale, licencat, të drejtat ekskluzive dhe pasuri të tjera, që përbëhen vetëm nga të drejta dhe që nuk kanë formë fizike.
Fitimi kapital nga dhurimi.
Të ardhura bruto të realizuara jashtë, territorit të Republikës së Shqipërisë;
Të ardhura bruto të tjera, të cilat nuk janë listuar më lart.
Osman Dedja/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.