Të bësh biznes në Shqipëri! 5 sektorët më atraktivë e me perspektivë zhvillimi për të ardhmen

Shumica e sipërmarrësve dhe menaxherëve më të suksseshëm besojnë se nëse dikush mund të njohë sektorët strategjikë dhe të studiojë me kujdes kushtet e tregut të një vendi, ato do të kenë sukses në çdo vend ku ato investojnë.

Po cilët janë sektorët me atraktivë dhe fitimprurës në Shqipëri, të favorshëm si për investitorët e huaj dhe ato vendas? Më poshtë janë të listuar disa prej tyre.

• Industria ushqimore

Shqipëria ka akoma një numër të ulët të fabrikave të përpunimit të ushqimit dhe produktet ushqimore kryesore janë të importuara nga vende të tjera. Tregu shqiptar ka nevoja të mëdha  për produkte të tilla dhe e ardhmja ofron mundësi të shumta për investitorët sepse kërkesa për produkte ushqimore do vazhdojë të ngelet në nivele të larta. Një marketing i mirë (i cili kushton shumë më lirë në Shqipëri se në vende të tjera) dhe një cilësi e mirë e produkteve do mund t’ju bënte një investitor të suksesshëm, pa marrë parasysh shumën e kapitalit fillestar të investuar.

• Manifaktura

Pse një investitor i huaj të kërkojë punonjës në Kinë apo diku tjetër kur mund t’i gjejë ato në mes të Europës dhe mund t’i paguajë ata po aq sa në Kinë, Taivan apo Kamboxhia? Në këtë mënyrë redukton thellësisht kostot e transportit … me fjalë të tjera shumë para të kursyera! Mjafton krijimi i degës së kompanisë në Shqipëri dhe gjetja e stafit. Kompanitë shqiptare  tashmë  kanë krijuar linja të mirëfillta prodhimi, nga lënda e parë deri në produktin përfundimtar të gatshëm për eksport.

• Shërbimi ndaj klientëve

Shqipëria ofron mundësi të mira për investimet e orientuara drejt shërbimit ndaj klientëve në fusha të ndryshme si: qendra për suport dhe orientim klienti, shërbime në fushën e IT-së, qendra për përpunim të dhënash etj. Dy janë avantazhet konkuruese për investimet në këtë sektor të ekonomisë i cili në vetëm pak vite është kthyer në një ndër më të preferuarit: shumica e të rinjve në vend kanë njohuri multilinguistike (anglisht, italisht, greqisht, spanjisht) dhe kostoja e ulët e forcës së punës, e përllogaritur sa 1/5 e asaj që është në vendet e BE-së.

• Turizmi

Vendi është i karakterizuar nga një numër i madh parqesh kombëtare, atraksione të shumta për turizëm historik e kulturor si dhe një vijë e mrekullueshme bregdetare rreth 450 kilometra nga veriu në jug. Potenciali për zhvillimin e një game të gjërë turistike plotësohet edhe nga peisazhet kodrinore dhe malore të cilat zënë rreth 2/3 e sipërfaqes së vendit. Parashikimet e kryera mbi zhvillimin e këtij sektori tregojnë se në vitin 2021 të ardhurat nga turizmi do të arrijnë në 29% të GDP-së.

• Energjia

Shqipëria renditet në vendet e para në Europë për pasuritë hidrike dhe mbështetet pothuajse tërësisht në gjenerimin e hidrocentraleve për të përmbushur kërkesat e saj në rritje të energjisë elektrike (98% e totalit të gjithë energjisë së prodhuar në vend).  Një ndër prioritetet kryesore të qeverisë shqiptare është që vendi të jetë në gjendje për të vetëpërmbushur të gjitha nevojat e tij energjitike dhe ta kthejë atë në një lojtar të rëndësishëm rajonal për sa i përket tregut energjitik. Me synim realizimin e këtij qëllimi janë dhënë një numër i madh kontratash koncensionare për investitorë të huaj e shqiptarë, të cilët ndërtojnë dhe shfrytëzojnë hidrocentrale të kapaciteteve të ndryshme.

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.