Të bësh pazar pa dalë nga shtëpia! Supermarketet në Tiranë e Durrës i përgjigjen karantinës, ofrojnë shërbimin në banesë. Krijojnë “shporta”
Në kushtet e masave parandaluese për përhapjen e COVID-19, pjesa më e madhe e aktiviteteve tregtare është mbyllur, me përjashtim të farmacive dhe marketeve.
Qytetarëve u kërkohet që të shmangin daljet e panevojshme jashtë banesave të tyre me qëllim që të shmangin kontaktet.
Në këtë situatë, edhe në Shqipëri, rrjetet më të mëdha të marketeve kanë gjetur zgjidhje alternative, duke ofruar edhe mundësinë që të mos dilet as për të bërë blerje për ushqime apo produkte të konsumit të përditshëm.
Nga një vëzhgim që bëri SCAN në faqet zyrtare të tyre në rrjetet sociale, supermarketet njoftojnë se ofrojnë shërbimin e “shportës” ku mund të porositet on-line dhe produktet t’u vijnë në banesë.
Në bashkëpunim me kompanitë private të shërbimit postar, marketet kanë publikuar numra të posaccëm ku mund të bëhet porosi (kryesisht për Tiranën dhe Durrësin) ndërsa pagesa mund të bëhet me para në dorë në momentin e dorëzimit.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.