Të dhëna negative për Britaninë – Prodhimi i fabrikave, ndërtimi dhe tregtia, tregojnë rënie në Prill
Prodhimi i fabrikave në Mbretërinë e Bashkuar ra në nivelin më të ulët në 5 vite e gjysmë gjatë muajit Prill, duke shkaktuar dyshime mbi gjendjen e ekonomisë. Paundi u zhvlerësua pas publikimit të të dhënave. Prodhimi i fabrikave u tkurr me 1.4%, që është norma e lartë negative që prej vitit 2012, sipas zyrës së Statistikave në Londër.
Prodhimi në ndërtim u rrit me 0.5%, shumë poshtë projeksioneve për një rimëkëmbje të fortë. Lajme negative erdhën edhe nga tregtia, ndërkohë që deficiti u zgjerua papritmas në nivelin më të lartë në 19 muaj, prej rënies së eksporteve ndaj vendeve jashtë Bashkimit Europian. Shifrat bëjnë kontradiktë me projeksionet e Bankës së Anglisë, që ka bërë të ditur se ngadalësimi i tremujorit të parë është i përkohshëm. Banka Qendrore deklaroi muajin e kaluar se normat e interesit do të rriten për të rikthyer inflacionin në nivelin objektiv prej 2%.
Paundi përmbysi trendin e rritjes pas raportimit, duke prekur 1.3350, në rënie me 0.4%. Nëntë nga 13 sektorë të manifakturës patën rënie të prodhimit në Prill, kryesisht metalet dhe pajisjet për transport. Prodhimi industrial në total ra me 0.8% gjatë muajit, që është rënia më e madhe për këtë vit, ndërkohë që kërkesa për energji ka rënë, prej motit më të ngrohtë.
Të dhëna të tjera nga zyra e Statistikave, treguan se deficiti tregtar u rrit në 14 miliardë paund, që është niveli më i lartë që prej Shtatorit 2016. Eksportet ranë me 5.9% që është rënia më e madhe që prej vitit 2015, ndërsa importet u rritën me 0.8%. Rritja e importeve u nxit nga volumi më i madh i naftës bruto, por rritja e çmimeve nuk pati shumë ndikim.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.