Të dhëna shqetësuese nga Kina – Tkurret ndjeshëm tregtia. Shton rreziqet për ekonominë botërore
Tregtia kineze është ngadalësuar në fund të 2018-ës, duke treguar dobësi në ekonominë e dytë më të madhe në botë për këtë vit si dhe përkeqësimin e kërkesës botërore.
Eksportet e kinës ranë në nivelin më të ulët në 2 vite gjatë Dhjetorit, ndërsa importet u tkurrën gjithashtu. Një tjetër element shqetësimi për politikëbërësit është suficiti me Shtetet e Bashkuara, që u rrit në nivel rekord për 2018-ën, gjë që mund të shtojë konfliktet me presidentin Donald Trump.
Kërkesa e dobët në Kinë po ndihet në të gjithë botën, ndërkohë që kanë rënë shitjet e mallrave nga iPhone e deri te makinat. Kjo ka bërë që kompani si Apple dhe Jaguar Land Rover të paralajmërojnë për shkurtim të vendeve të punës.
Të dhënat e dobëta mbi tregtinë tregojnë se ekonomia kineze mund të jetë ngadalësuar më shumë se sa pritej në 2018-ën.
Eksportet për Dhjetorin ranë me 4.4%, ndërsa importet pësuan një tkurrje me 7.6%, që është rënia më e madhe që prej Korrikut 2016.
Tregtia neto ka qenë një pengesë për ekonominë kineze që prej tremujorit të parë të vitit të kaluar, ndërkohë që 2017-a pati performancë të fortë.
Suficiti i ndjeshëm politikisht me Shtetet e Bashkuara, u rrit me 17.2% në 323.3 miliardë dollarë në vitin 2018, që është niveli më i lartë që prej vitit 2006.
Washingtoni i ka kërkuar Pekinit që të ndërmarrë masa për ta ulur suficitin tregtar. Eksportet kineze kanë injoruar tarifat për pjesën më të madhe të 2018-ës, për shkak se kompanitë kanë shtuar dërgesat përpara rritjes së barrierave tregtare.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.