Të dhënat e 500 milion përdoruesve të Facebook gjenden në një faqe për hakerat

Të dhëna personale nga më shumë se 500 milion përdorues të Facebook janë gjetur të disponueshme në një faqe në internet për hakerat.

Informacioni duket të jetë disa vjeçar, por është një shembull tjetër i sasisë së madhe të informacionit të mbledhur nga Facebook dhe faqet e tjera të mediave sociale dhe kufijve se sa i sigurt është ai informacion.

Disponueshmëria e grupit të të dhënave u raportua së pari nga Business Insider. Sipas këtij botimi, ai përmban informacion nga 106 vende duke përfshirë numrat e telefonit, ID-të e Facebook, emrat e plotë, vendndodhjet, datat e lindjes dhe adresat e postës elektronike.

Facebook ka vite që merret me çështjet e sigurisë së të dhënave. Në vitin 2018, gjiganti i mediave sociale çaktivizoi një veçori që lejonte përdoruesit të kërkonin njëri-tjetrin përmes numrave të telefonit, pas zbulimeve që firma politike Cambridge Analytica kishte hyrë në informacione deri në 87 milion përdorues pa dijeninë ose pëlqimin e tyre.

Në dhjetor 2019, një studiues ukrainas i sigurisë raportoi se gjeti një bazë të dhënash me emrat, numrat e telefonit dhe ID-të unike të përdoruesve të më shumë se 267 milion përdoruesve të Facebook – pothuajse të gjithë me bazë në SHBA – në internet.

D.B – SCAN
Burimi: The Guardian

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.