Të dhënat për Shtatorin – Eksport-importi i mallrave nëpërmjet detit dominues
INSTAT ka publikuar raportin mbi statistikat e transportit të mallrave për muajin Shtator, 2017. Gjatë këtij muaji, vlera e mallrave të tregtuara (eksport/ import) është 77 mld lekë.
Sipas raportit, rreth 65 për qind e mallrave janë eksportuar nëpërmjet detit, i cili është rritur me 14.5 për qind në krahasim me periudhën Shtator 2016.
Përmes transportit rrugor rreth 34 për qind, duke shënuar kështu një rritje me 24 për qind krahasuar me po të njëjtën periudhë të vitit të kaluar.
Përqindjen më të ulët të eksportimit të mallrave e mban transporti ajror, me 0.3 për qind.
Sa i përket mallrave të importit, edhe ato janë realizuar më së shumti me anë të transportit detar, i cili zë 46.3 për qind, ndjekur nga transporti rrugor me 42.2 për qind.
Lidhur me importin e mallrave nëpërmjet transportit detar, shifrat tregojnë një rënie me 0.9 për qind krahasuar me po të njëjtën periudhë të një viti më parë.
Ndërsa me anë të transportit ajror janë importuar rreth 2.8 për qind e mallrave, thuhet në raport.
Importi i mallrave me transport rrugor është rritur me 9 herë, në krahasim me Shtator 2016, raporton portali SCAN.
Genta Dobra/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.