Të “fortët” e BE – Tre shtete gjenerojnë 50% të PBB, 11 zënë më pak se 1%
Gjatë 2016-ës, Prodhimi i Brendshëm Bruto i Bashkimit Europian arriti në 14800 miliardë euro, të konvertuara sipas çmimeve aktuale. Thuajse gjysma e PBB-së u gjenerua nga vetëm tre shtete anëtare, më saktësisht; Gjermania, Mbretëria e Bashkuar dhe Franca.
Me një ekonomi të barabartë me 3100 miliardë euro në vitin 2016, Gjermania është ekonomia më e madhe e Bashkimit Europian, dhe zë më shumë se një të pestën e totalit të PBB-së, plot 21.1%.
Në vend të dytë renditet Mbretëria e Bashkuar me 16%, çka do të thotë se pas Brexit ekonomia e unionit do të tkurret ndjeshëm. Në vend të tretë ndërkohë renditet Franca me 15%, e ndjekur nga Italia me 11.3%.
Vendet e tjera të listës kanë një diferencë të theksuar me ndjekësit. Listën e 5 ekonomive më të mëdha te Europës e mbyll Holanda, që zë 7.5% të Prodhimit të Brendshëm Bruto të unionit.
Nga krahu i kundërt ndërkohë, ka plot 11 shtete anëtare, ekonomia e të cilave zë më pak se 1% të prodhimit të Brendshëm Burot të unionit. Estonia, Qipro dhe Malta zënë vetëm 0.1%. Ekonomi si Greqia apo Portugalia zënë vetëm 1.2%.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.