Të fundit në rajon për shpenzimet për shëndetin – BB: Qeveria shqiptare kanalizon vetëm 307 dollarë për frymë, 65% më pak se vendi i parafundit

Shqipëria ka shpenzimet më të ulta publike për shëndetin për frymë në rajon, thotë Banka Botërore në serinë më të fundit të publikimeve për rajonin dhe ndikimin e covid-19. Në raportin dedikuar pikërisht sistemeve shëndetësore bie në sy fakti se, në Shqipëri shpenzimet publike për shëndetësinë fiksohen në vetëm 307 dollarë për frymë. Mesatarja e Bashkimit Europian është 10 herë më e lartë. Kjo shifër, prej 307 dollarësh për frymë është gjithashtu 65% më e ulët se ndjekësi më i afërt, që është Mali i Zi.

Për Kosovën ndërkohë nuk ka të dhëna. Shpenzimet e ulta publike për shëndetësinë përkthehen jo vetëm në një sistem të dobët shëndetësor dhe të paaftë të përballojë kriza si kjo që ka goditur të gjithë botën, por transferojnë kostot direkt në xhepat e qytetarëve. Mungesa e shpenzimeve publike në sektor bën që qytetarët të pagujane vetë për shëndetin, nga xhepi i tyre. I njëjti raport i Bankës Botërore tregon se, Shqipëria ka normën më të lartë të shpenzimeve nga xhepi, në masën 50% të totalit të shpenzimeve për shëndetin.

Për vendet e tjera të rajonit, kjo normë është ndjeshëm më e ulët. Gjithsesi, Banka Botërore sinjalizon se këto shpenzime të ulta publike për sektorin, për fat të mirë, nuk janë përkthyer në një krizë më të rëndë shëndetësore nga Covid-19 në vendin tonë, të paktën deri më tani. Institucioni nënvizon gjithashtu faktin se sistemet shëndetësore në rajon janë bërë të cënueshme edhe nga migrimi i forcës së punës në sektor.

Roel Korkuti / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.