Të jesh femër në Shqipëri – Indeksi i paqes dhe sigurisë për femrat, vend i 4-t nga fundit në Europë

Të jesh femër në Shqipëri nuk është aspak e thjeshtë. Indeksi i paqes dhe sigurisë për femrat i publikuar së fundmi nga Instituti i Georgetown për femrat, paqen dhe sigurinë, e rendit Shqipërinë në vendin e 57-të në botë ndër 167 vende të ndryshme të globit, me vendin e parë të listës që është vendi më i mirë në planet për të qenë një femër.

Renditja tregon se Shqipëria është jo vetëm e fundit në rajon por edhe vend i 4-të me performancën më të dobët në kontinentin e vjetër. Vetëm Moldavia, Ukraina dhe Turqia janë vende më të këqija se Shqipëria në Europë për një femër. Indeksi i përgjithshëm dhe pikëzimi përllogaritet mbi bazën e 3 shtyllave kryesore; përfshirja, drejtësia dhe siguria. Indikatori i parë, ai i përfshirjes, analizon elementë si: edukimi, përfshirja financiare, përdorimi i telefonisë celulare, apo edhe përfaqësimi parlamentar apo punësimi.

Sa i përket shtyllës së parë, asaj të përfshirjes, thuajse të gjithë komponentët e saj janë përmirësuar krahasuar me vitin 2017, thotë raporti. Përmirësim të lehtë ka bërë edhe nën-indikatori i perceptimit të sigurisë mes femrave. Në nivel global, vendi më i mirë dhe më i sigurtë në rast se ke lindur femër, vijon të mbetet Norvegjia, e ndjekur nga Zvicra dhe Finlanda ndërkohë që tre vendet e fundit i zë: Siria, Afganistani dhe Yemeni.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.