Të konkurrosh me Europën/ Shqipëria dhe bizneset e saj nuk kanë njohuri në edukim dhe teknologji

Aftësia konkurruese e Shqipërisë pengohet nga dija e pakët në aftësi sipërmarrëse dhe teknologjike si dhe nga niveli i ulët i edukimit. Janë këto fjalët e Komisionit Europian në raportin e fundit të publikuar i titulluar: “Progresi në përafrimin e kritereve ekonomike të vendeve kandidate”. Në këtë raport bëhet një radiografi e ekonomisë dhe rrugës së zhvillimit të secilit shtet që kërkon të përfshihet në klubin europian.

Në analizën e komisionit për çështjen e aftësive për të garuar me kompanitë europiane, Shqipëria karakterizohet nga dobësi në produktin e eksportuar dhe në integrimin rajonal. Sipas Europës zyrtare në Shqipëri gjithashtu ka një mungesë të theksuar të investimit në kërkim, zhvillim dhe inovacion.

Për të zvogëluar këto dobësi si dhe për të bërë Shqipërinë dhe bizneset e saj konkurruese kundrejt palës europiane, Komisioni jep disa udhëzime.

Së pari kërkon rritjen e shpenzimeve publike, si përqindje e prodhimit të brendshëm bruto, për edukimin dhe kërkimin me fokus në arsimin profesional dhe trajnimet. Së dyti udhëzon përmirësimin në hartim dhe ekzekutim të investimeve publike.

Së treti Komisioni Europian udhëzon qeverinë shqiptare që të rrisë aksesin në shërbime teknike për sipërmarrje të vogla dhe të mesme të cilat operojnë lokalisht, me qëllim ndihmën ndaj tyre për të eksportuar.

Ndër të tjera, bazuar në raportet e mëparshme, por që përsëriten si probleme edhe këtë vit, është numri i ulët mesatar i punonjësve në kompanitë shqiptare, paaftësia për t’u adaptuar me modelet e reja të biznesit si dhe mbështetja e madhe te sektori i shërbimeve dhe jo ai i prodhimit

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.