“Të palegalizueshmit”, Lame: Do të përshtasim ligjin për të zgjidhur problematikat e objekteve
Drejtori i Përgjithshëm i Kadastrës, Artan Lame, gjatë ceremonisë së shpërndarjes së certifikatave të legalizimeve në Zall- Herr tha se Kadastra po bashkëpunon me Qeverinë dhe Kuvendin për përshtatjen e ligjit, për zgjidhjen e problematikave të atyre që nuk munden të legalizojnë objektet e tyre. Lame e ndau këtë si lajm të mirë, duke marrë parasysh se edhe pse një numër objektesh arritën të legalizoheshin, ky proces nuk i përfshiu të gjithë, pikërisht për shkak të problematikave.
“Zall Herri është një njësi administrative që ka pasur 1310 ndërtime pa leje, shenjë e qartë që juve ju ka ngrënë duart për punë dhe keni bërë goxha punë, sepse 1310 shtëpi nuk janë pak. Nga ana tjetër kuptohet dhe për drejtorinë ishte një punë kolosale përfundimi i këtij procesi.
Me këto 131 leje që jepen sot përmbyllet ky proces në Njësinë Administrative Zall- Herr. Ka qenë një punë e madhe, mbeten edhe një numër i vogël, por sidoqoftë i rëndësishëm, që nuk legalizohen dot për shkak të ndërtimi jashtë afatit, ose për shkak të vendit të ndërtimit që mund të bie buzë rrugës, buzë lumit, pra në vende ku ligji e ndalon legalizimin” theksoi Lame.
Sipas raportit të ALUIZNI-t, ndërtimet e palegalizueshme zënë afërsisht 29% të totalit. Sipas shifrave të raportuara nga vetë ALUIZNI në fund të vitit 2018, numri total i aplikimeve të regjistrua më gjithë vendin është 323.082, ndër të cilat 228.951 të legalizueshme dhe 94.131 të palegalizueshme.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.