Të parafundit në rajon për remitanca! 323 euro për frymë, vetëm Mali i Zi më pak se ne

Të dhënat më të fundit të eurostat ofrojnë një bazë krahasuese mes vendeve të rajonit dhe atyre europiane sa i përket remitancave. Shifrat thonë se, në 2018, në Shqipëri hynë 926 milionë euro dërgesa, nga 872 të vitit paraardhës, në rritje me 6.2%.

Vendet e Bashkimit Europian dërgojnë 83% të të gjitha parave në Shqipëri. Po të bëjmë një krahasim me vendet e tjera të rajonit, Shqipëria rezulton të jetë në vend të katërt, por krahasimi më i saktë duhet bërë në bazë të dërgesave për frymë. Mesatarisht një shqiptar ka marrë 323 euro për frymë nga jashtë një vit më parë, nga 303 euro të vitit paraardhës.

Kjo është shifra e dytë më e vogël në rajon, pas Malit të Zi. Në vend të parë qëndron Kosova me 444 euro për frymë, e ndjekur nga Serbia me 416 euro, Bosnje Hercegovina me 394 euro për frymë, Maqedonia e Veriut me 366 euro për frymë dhe në fund, pas Shqipërisë, Mali i Zi me vetëm 95 euro për frymë. Sa i përket parave të dërguara jashtë ndërkohë, përllogariten në vetëm 73 milionë euro, 70% prej të cilave drejt vendeve të Bashkimit Europian.

Përkthyer në shifra për frymë, rezulton se çdo shqiptar ka dërguar mesatarisht 25.5 euro jashtë vendit gjatë vitit të kaluar. Kjo është norma e tretë më e lartë në rajon, pas Malit të Zi dhe Serbisë, ndërkohë që pas nesh ndjek Kosova, Bosnje Hercegovina dhe Maqedonia e Veriut.

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.