Të pavaksinuarit në Europë: 6 nga 10 francez në favor të bllokimeve ndërsa në Austri testi PCR për ta bëhet i detyrueshëm. Gjermania sërish rekord rastesh
Përballë përkeqësimit të situatës shëndetësore, 60% e francezëve thonë se janë në favor të një bllokimi vetëm për personat e pavaksinuar, sipas një studimi të institutit Elabe. Infeksionet ditore kanë qenë rreth 20,000 për disa ditë rresht në vend, duke dyfishuar mesataren e një jave më parë. 60% e francezëve thonë se janë të shqetësuar për situatën, ku të vaksinuarit janë të shqetësuar në 63% dhe të pavaksinuarit në 40%.
Shumica e francezëve besojnë se nuk do të ketë një bllokim të ri të përgjithësuar, por 59% janë pro aplikimit të kësaj mase vetëm për ata që nuk janë vaksinuar, siç ndodh në Austri. Në pjesën më të madhe kundër masës (74%) janë ata që janë të përfshirë drejtpërdrejt pra ata që nuk e kanë bërë vaksinën.
Në Gjermani janë konfirmuar 65,371 raste të reja me koronavirus në 24 orët e fundit, shifra më e lartë që nga fillimi i pandemisë. Kjo u bë e ditur nga Instituti Robert Koch (Rki), i porositur nga qeveria e Berlinit për të monitoruar ecurinë e pandemisë në vend. Është rritur edhe norma e incidencës 7-ditore në vend, në 336.9, shpjegon instituti. Gjithashtu janë 264 persona që humbën jetën ditën e fundit për shkak të komplikimeve që i atribuohen koronavirusit.
Që nga e hëna, personat e pavaksinuar që udhëtojnë për në Austri duhet të kenë PCR negative. Testet e antigjenit dhe testet e antitrupave nuk do të lejohen më. Siç është komunikuar nga autoritetet përjashtime janë dhënë vetëm për udhëtarët ndërkufitarë (për arsye pune, shkolle, studimi, familjare ose për të vizituar bashkëshortin), për të cilët rregulli i mëparshëm vazhdon të zbatohet. Sidoqoftë, vlefshmëria e testeve të udhëtarëve reduktohet për PCR-të nga 7 ditë në 72 orë dhe për testet antigjenike nga 48 në 24 orë.
E . S /SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.