Të përjashtuar nga ndihma ekonomike? Nga sot, shans i ri! Nisin efektet e udhëzimit që lejon bashkitë të përdorin fondin 6 % dhe masa e re e ndihmës

Familjet që nuk arrijnë të përfitojnë ndihmë ekonomike sipas sistemit të pikëzimit që parashikon skema e re, tashmë kanë një shans tjetër. Nga dita e sotme ka hyrë në fuqi udhëzimi i Ministrisë së Mirëqenies Sociale që parashikon që Këshilli i Bashkisë ka të drejtë të miratojë dhënien e ndihmës ekonomike për familjet që nuk janë përfituese nga sistemi i pikëzimit, duke përdorur deri në 6% nga fondi i kushtëzuar për bllok ndihmën ekonomike.

Udhëzimi përcakton se mbi këtë fond mund të shtohen ose jo edhe fonde të buxhetit vendor. Akordimi i fondit deri në 6 përqind do t’i shtohet çeljes faktike të çdo 2-mujori që transferohet për përfituesit e ndihmës ekonomike të përzgjedhura nga sistemi i pikëzimit. Këshilli i Bashkisë miraton në fillim të vitit kriteret për familjet në nevojë që do të trajtohen me fondin deri në 6 përqind.  Familjet në nevojë do të përzgjidhen nga lista e familjeve që kanë aplikuar brenda tre muajve të fundit nëpërmjet regjistrit elektronik për ndihmë ekonomike dhe që nuk janë shpallur përfitues nga sistemi i pikëzimit .

Do të jetë struktura përgjegjëse për shërbimet sociale në Bashki ajo që do të hartojë projektvendimin për familjet në nevojë nën juridiksionin e Bashkisë, në bazë të propozimeve dhe vlerësimeve social ekonomike të ardhura nga njësitë administrative, për trajtim me ndihmë ekonomike nga fondi i kushtëzuar deri në 6 përqind.

Struktura përgjegjëse për shërbimet sociale në Bashki përllogarit fondin për mbulimin e familjeve në nevojë që do të trajtohen nga fondi i kushtëzuar deri në 6 përqind dhe e dërgon për miratim në Këshillin e Bashkisë.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.