Të punosh në shtet – Senida Mesi: Ja 3 punët që kërkohen nga shumica e shqiptarëve
Senida Mesi, Zv/Kryeministrja e Republikës së Shqipërisë, ka qenë e ftuar në SCAN për të folur për ecurinë e rekrutimit në administratën publike si dhe përballjen me kërkesat për punë nga ana e qytetarëve. Mesi ka treguar se cilat janë kërkesat më të mëdha për vende pune në shtet.
“Evidentojmë shumë nevoja për punësim dhe në momentin që i thua ‘Po, kam një subjekt privat i cili ka nevojë për punë. Jo, jo! Unë nuk doja atë punë, unë doja punën e cila është në shtet.’ Dhe dy punët më të kërkuara, kategoritë më të kërkuara janë tre: shoferë, roje dhe pastruese. Domethënë, punë të nivelit ku dhe vlerësimi i performancës dhe vështirësia janë le të themi minimale.”
Mesi thekson se Shqipëria ende vuan nga mentaliteti i punës në administratën shtetërore si punë e lehtë dhe e përjetshme.
“Sfida më e madhe që qeveria shqiptare ka aktualisht është ndërrimi i këtij mentaliteti që puna në shtet nuk është puna që rri por është një punë që duhet të performohet dhe nuk është një punë që hyn për qëllime personale, përfitime personale apo një punë që mbi rrogën të del ndonjë ryshfet. Dhe këtu njëherë e mirë administrate publike së bashku me drejtuesit duhet ta marri vesh që puna në shtet është puna në shërbim të qytetarit”, tha Mesi.
Lidhur me procesin e punësimit në nivelin e nëpunësit civil, Mesi ka shpjeguar si po funksionon pas aktivizimit të platformës online.
“Për nëpunësin civil bëhen vetëm nëpërmjet sistemit online, bëhet shpalljet sipas nevojave të çdo institucioni, sipas një procesi të parapërgatitur të vlerësimit të nevojave për vitin ku secila nga ministritë dërgon nevojat e vitit ta aprovon departamenti i administratës publike. Departamenti i Administratës publike në kuadër të kritereve ligjore për secilin nga pozicionet bën dhe shpalljen e thirrjes. Me detyrim ligjor kanë prioritet ato që kërkojnë lëvizje paralele që janë brenda sistemit të administratës, nëpunësit civilë. Nëse aty nuk ka fitues atëherë hapet konkursi për të jashtëm, jashtë sistemit për të aplikuar”, u shpreh zëvendëskryeministrja.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.