Të pushuarit nga puna “kushtuan” 32 milionë euro – Shteti, 110 milionë euro borxh ndaj bizneseve dhe qytetarëve!

Viti 2021 është mbyllur me një faturë detyrimesh të prapambetura të shtetit shqiptar kundrejt biznesve dhe individëve,  prej afro 13.2 miliardë lekësh apo 110 milionë eurosh.   Referuar të dhënave zyrtare të Ministrisë së Financave, të zbardhura nga TV SCAN,  krahasuar me shtatorin e vitit 2021 fatura e detyrimeve të prapambetura ka ardhur në rënie me rreth 6.5 miliardë lekë.

Peshën më të madhe të stokut të borxhit e e mban pushteti vendor me rreth 6.6 miliard lekë,  nga të cilat 3.6 miliardë lekë janë krijuar krijuar nga investimet, për shkak të hapjes së projekteve pa pasur fondet e mjaftueshme nga bashkitë, dhe një vend të konsiderueshëm zënë vendimet gjysore me rreth 695 milionë lekë.

Ndërsa detyrimet e institucioneve qendrore llogariten në rreth 6.2 miliardë lekë. E ndarë sipas zërave, vendimet gjyqsore për largime të padrejta nga puna të punonjësve të administratës, të cilat ende nuk janë shlyer, janë ato që peshojnë më së shumti në vlerën e detyrimeve, të cilat i kanë kushtuar buxhetit qendror afro 3.2 miliardë lekë.

Ndërsa investimet dhe shërbimet gjithashtu zënë një hapsirë të konsiderushme, prej rreth 1.2 miliardë lekësh në total.  Nga ana tjetër fatura e mosrimbursimit të  TVSH-së nga Drejtoria e Përgjithshme e Tatimeve ëpër hërë të parë është në nivele shumë të ulëta, në rreth 384 milionë lekë.

Elisabeta Dosku / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.