Të raportohen humbjet në Arbitrazhe – KLSH: Ministria e Financave të bëjë publike shifrat. Vlerësimet shkojnë në 190 milionë dollarë
Kontrolli i Lartë i Shtetit i kërkon Ministrisë së Financave të bëjë publike vendimet që pritet të ekzekutohen për shkak të arbitrazheve ndërkombëtare dhe shifrave përkatëse që do paguhen nga buxheti i shtetit. Në raportin për buxhetin e vitit të shkuar të sapo depozituar në Kuvend, Kontrolli i Lartë i Shtetit evidenton një shifër që arrin në rreth 190 milionë dollarë.
“Në raportin e Ministrisë së Financave për Zbatimin e Buxhetit nuk ka vlerë të raportuar mbi vendimet që priten të ekzekutohen për çështje të arbitrazhit apo GJEDNJ, pavarësisht se niveli i lartë i tyre në proces ekzekutimi impakton Buxhetin e Shtetit të vitit të ardhshëm. Bazuar në ngjarjet pas periudhës raportuese, si dhe deklarimin e Ministrisë së Financave dhe Ekonomisë, në raportin e mes vitit për buxhetin e vitit 2020 këto detyrime vlerësohen nga KLSH në rreth 19 miliard lekë”, thekson në raport Kontrolli i Lartë i Shtetit.
Ndërkaq janë disa çështje me vlera shumë të mëdha financiare për të cilat shteti shqiptar mund të paguajë disa qindra miliona dollar. Kryesorja mes tyre është ajo me Biznesmenit italian Becheti, i cili ka fituar nga shteti shqiptar rreth 109 milionë euro, e pasuar nga një përplasje me kompaninë Turke Kurum, e cila në Arbitrazh kërkon nga shteti shqiptar një dëmshpërblim prej rreth 100 milionë eurosh. Kompania greke Aktor, e përshirë në ndërtimin e Rrugës Tiranë Elbasan e ka paditur shtetin shqiptar në arbitrazh për shumën prej 44 milionë eurosh.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.