Të reduktohen humbjet e energjisë në rrjet – Ndryshon plani në kredinë me BERZH, deri në 2026-ën të shkojë 17.8%
Niveli i humbjeve të energjisë elektrike në rrjetin duhet të reduktohet, ndërkohë që deri në vitin 2026 ky tregues duhet të arrijë në 17.8%, nga 21.48% që ishte gjatë vitit 2020 apo 20.94% që rezultoi në 9-mujorin e këtij viti. Qeveria ka miratuar rishikimin e planit për reduktimin e humbjeve në planin e konsolidimit financiar të sektorit elektorenergjetik, të përcaktuar në kredinë e marrë gjatë vitit 2014 nga Banka Evropiane për Rindërtim dhe Zhvillim.
Ndërkohë që, sipas treguesve të rinj, për vitin 2021 humbjet e energjisë në rrjet duhet të rezultojnë në 20.5%, ndërsa në vitin që vjen 19.6%, duke arritur në 17.8% në vitin 2026. Reduktimi i humbjeve në rrjet kërkon investime serioze, ndërkohë që aktualisht përmes vendimit për shpalljen e gjendjes së emergjencës, qeveria ka urdhëruar kompanitë publike të pezullojnë investimet deri në muajin prill të vitit që vjen.
Paralelisht, në funksion të emergjencës së shpallur nga qeveria, në Fletoren Zyrtare është publikuar edhe vendimi që parashikon se Korporata Eletorenergjetike Shqiptare duhet të furnizojë Furnizuesin e Shërbimit Universal me të gjithë sasinë e nevojshme, për qëllime të plotësimit të kërkesës së plotë për energji. Ndërkohë që, për nevoja të sigurimit të gjithë energjisë sënevojshme për furnizimin e klientëve universalë, KESH-it i jepet e drejta të kryejë procedura të posaçme konkurruese për marrjen me qira të aseteve gjeneruese termike të energjisë për një periudhë deri në 3 vjet.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.