Të rinjtë e drejtësisë – Hajdari: E ardhmja e institucioneve publike
Ata që sot janë pjesë e auditoreve do të jenë e ardhmja e institucioneve publike nesër dhe e sistemit të drejtësisë. Kështu u shpreh Inspektori i Përgjithshëm, Shkëlqim Hajdari, në një kohë kur në vend është në hapat e parë implementimi i reformës në drejtësi.
Sipas tij, ka ardhur koha për ndërgjegjësimin e opinionit publik, biznesit dhe profesionistëve të ligjit për rolin, rëndësinë dhe faktorët e suksesit të reformës në inspektime.
“Studentët e fakultetit të drejtësisë janë e nesërmja e njerëzve të cilët, ashtu siç u shpjeguam nuk do të punojnë të gjithë nëpër gjykata apo prokurori, por vendet e punës së tyre do të jenë edhe nëpër hipoteka, edhe në administratën publike, edhe në ALUIZNI, por sidomos një fushë e gjerë është edhe punësimi i tyre nëpër inspektoriatet shtetërore dhe nëpër biznese të cilët do të kenë shumë nevojë për njerëz të cilët duhet ta njohin shumë mirë ligjin e inspektimit”, u shpreh Hajdari.
Këtë deklaratë kreu i Inspektoriatit Qendror e bëri në ambientet e Fakultetit të Drejtësisë të Universitetit të Tiranës, ku u nënshkrua dhe Memorandumi i Bashkëpunimit dhe Mirëkuptimit ndërmjet Inspektoratit Qendror dhe Fakultetit të Drejtësisë.
Në ceremoninë e nënshkrimit ishte i pranishëm dhe Jean Peirre Dalle, Inspektor i Përgjithshëm për Administratën në Republikën e Francës, si dhe përfaqësuesja rezidente e projektit të Binjakëzimit për Administratën BE- Shqipëri, Ramona Moldovan.
Violeta Shqalsi/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.