“Të rregullohen çmimet e Vodafone”/Konkurrenca për AKEP: Ndërhyni te tarifat me pakicë
Autoriteti i Konkurrencës rekomandon vendosjen nën rregullim të tarifave me pakicë të operatorit më të madh të telefonisë celulare, Vodafone Albania.
Përmes një pakete rekomandimesh për Autoritetin e Komunikimeve Elektronike dhe Postare (AKEP), Autoriteti i Konkurrencës kërkon që pozita dominuese e Vodafone në tregun me pakicë të telefonisë celulare të rregullohet në mënyrë më efikase.
Rekomandimi për të rregulluar tarifat me pakicë kërkon që të adresohet sidomos fakti që tarifat standarde jashtë paketave ofertë, janë shumë të larta.
Rekomandimet e tjera kërkojnë gjithashtu orientimin drejt kostove të tarifave për shërbimet e terminimit dhe të akses-origjinimit.
Gjithashtu, AKEP i kërkohet që të kryejë testime për “shtrydhje” të çmimeve, me qëllim parandalimin e sjelljeve antikonkurruese, përmes ofrimit të tarifave nën kosto për të nxjerrë jashtë tregut konkurrentët më të vegjël.
Në fillim të këtij viti, AKEP kishte paralajmëruar masa të forta për të vendosur ekuilibra në tregun celular dhe në veçanti për të mos lejuar abuzimin me pozitën dominuese nga Vodafone.
Por, me sa duket, për shkak të lobimit të fortë politik nga Vodafone, Këshilli Drejtues i AKEP u tërhoq pothuajse nga të gjitha masat e propozuara.
Ndërkohë që beteja duket se, të paktën për momentin, është fituar nga Vodafone, në lojë ka hyrë autoriteti i Konkurrencës, që ka dalë me rekomandime shumë të forta, deri në rregullimin e tarifave me pakicë, masë kjo që do ta kthente rregullimin e tregut më shumë se një dekadë mbrapa.
Në vitin 2006, AKEP (në atë kohë ERT) vendosi të rregullonte tarifat me pakicë të thirrjeve celulare, për të frenuar çmimet abuzive të vendosura në atë kohë nga AMC dhe Vodafone.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.