“Të rritet kufiri i taksimit për dërgesat online” – MIE: Vendosja e taksës penalizoi zhvillimin e e-commerce në Shqipëri
Tregtia elektronike është një mundësi e mirë rritjeje për Shqipërinë. Por, analizat e publikuara vitet e fundit nga Banka Botërore, tregojnë se penetrimi i e-commerce në Shqipëri është i limituar dhe mbetet pas fqinjëve të rajonit. Sipas anketës Global Findex 2017, vetëm 7% e shqiptarëve kanë raportuar se kanë përdorur internetin për të kryer blerje online, në krahasim me 14% të pjesës tjetër të rajonit të Ballkanit Perëndimor.
Kjo është vlera më e ulët midis vendeve të Ballkanit Perëndimor, si dhe është larg vendeve të tjera në rajon me të njëjtin nivel të ardhurash, si Moldavia. Në rastin e tregtisë elektronike ndërkufitare dhe shpërndarjen e pakove postare të vogla, këto shqetësime janë rritur, shpesh për shkak të kostove të procedurave administrative më të lartë se vetë vlera e dërgesës.
Një vlerë minimale 22 euro është caktuar, poshtë së cilës importet përjashtohen nga TVSH-ja e importit dhe detyrimet doganore, duke kursyer në kosto administrative. Por, operatorët postar raportojnë kosto të larta administrative në zhdoganimin e dërgesave të vogla në doganat shqiptare, duke rritur në këtë mënyrë tarifat për trajtimin e dërgesave në doganë dhe duke kontribuar në vonesën e dërgesave.
Për të shmangur këto pengesa, Ministria e Infrastrukturës dhe Energjisë në Dokumentin e Politikës së Shërbimeve Postare 2021-2026 propozon krijimin e një one-stop-shop online për pagesën e TVSH, rritjen e tarifës minimale për detyrimet e importit, apo eliminimi i tarifave të skanimit për dërgesat me vlerë të ulët. Kufiri i taksueshëm në 22 euro për blerjet online nga jashtë u vendos në muajin gusht 2016. Më parë, dërgesat online deri në 145 euro nuk kishin nevojë për zhdoganim.
Roel Korkuti / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.