TEC-i i Vlorës – MIE hap garën koncesionare për rehabilitimin dhe vënien në punë të centralit
Ministria e Infrastrukturës dhe Energjisë ka shpallur garën për dhënien me koncesion/PPP për rehabilitimin dhe vënien në punë të Termocentralit të Vlorës si dhe të ndërtimit të tubacionit Fier-Vlorë të furnizimit me gaz të TEC-it.
Vlera e parashikuar e projektit sipas studimit të fizibiliteti është më shumë se 58.7 milionë euro, ndërsa lloji i kontratës që do të nënshkruhet është parashikuar të jetë e tipit R.O.O.T., e cila përfshin rehabilitimin, operimin dhe më pas transferimin pranë autoriteteve shtetërore.
Përzgjedhja e ofertuesit do të bëhet bazuar në një procedurë të hapur konkurrimi dhe vlerësimi do të jetë 100 pikë në total. Më konkretisht:
- Kriteri teknik: 40 pikë
- Kriteret financiare 30 pikë
- Përvoja e ofertuesit në 7 vitet e fundit: 23 pikë
- Koha për vënien në funksion të TEC-it: 7 pikë
Afati për dorëzimin e ofertave është përcaktuar data 28 shkurt 2019, ndërsa kohëzgjatja e kontratës përfshin 150 ditë kalendarike nga firmosja e saj. Centrali elektrik ka një kapacitet të instaluar 97 MW dhe nuk ka funksionuar që prej vitit 2012.
Genta Dobra/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.