Tekstet e reja shkollore – MASR: Përfundon cikli i prodhimit të tyre të mbështetura në kurrikulën e re

Ka përfunduar cikli i prodhimit të teksteve shkollore të mbështetura në kurrikulën e re. Njoftimi vjen nga Ministria e Arsimit, Sportit dhe Rinisë e cila vijon prej disa muajsh përgatitjet për nisjen e vitit të ri shkollor.

“Kurrikula e re që synon ndërtimin e kompetencave të komunikimit, logjikës, qytetarisë etj, kishte nevojë për tekste të reja që ndihmonin mësuesit dhe nxënësit për të arritur ato kompetenca. Ndaj morëm tekste nga shtëpi botuese prestigjioze si “Oxford”, “Cembridge” dhe “Pearson”, sidomos për lëndët e shkencave”, thuhet në njoftimin e MASR.

Po ashtu, sipas ministrisë, në shtator për nxënësit në të gjithë vendin do të ketë 90 shkolla të reja dhe të rikonstruktuara me terrene sportive. Ndërkohë, për fëmijët nga klasa e parë deri në klasën e katërt do të përfitojnë për herë të parë libra falas, një nismë e cila pritet të zgjerohet më tej. Sa i takon kategorive të nxënësve që marrin tekste falas, sipas MASR-së disa prej tyre përfshijnë:

• Fëmijët/nxënësit që ndjekin arsimin fillor nga klasa e parë deri në të katërt
• Fëmijët/nxënësit që janë i treti e më lart në radhën e shkollimit të fëmijëve të së njëjtës familje
• Fëmijët/nxënësit që janë pjesë e familjeve që trajtohen me ndihmë ekonomike dhe pagesë papunësie nga njësitë e vetëqeverisjes vendore
• Fëmijët/nxënësit që janë viktima të trafikimit e marrin ndihmë dhe asistencë nga Qendra Kombëtare e Pritjes së Viktimave të Trafikimit, Qendra Kombëtare e Viktimave të Dhunës në Familje dhe Qendra Kombëtare Tranzitore e Emergjencës
• Fëmijët/nxënësit që janë përfitues në institucionet e përkujdesit social rezidencial në Qendrën Kombëtare të Pritjes së Viktimave të Trafikimit
• Fëmijët romë dhe egjiptian
• Fëmijët jetim etj

“Së bashku me nxënësit e ciklit të ulët, libra falas në Republikën e Shqipërisë do të përfitojnë mbi 2/3 e të gjithë nxënësve që janë pjesë e arsimit të detyrueshëm. Përpjekja jonë për qasje të barabartë në shkollim nuk merr fund këtu. Kemi shumë punë për të bërë. Por, në të njëjtën kohë, jemi të lumtur që kemi arritur të lehtësojmë buxhetin familjar për nevoja shkollimi për rreth 200 mijë familje”, shton më tej MASR.

Sa i takon çmimit të teksteve të reja, ministria pohon se kanë çmime të ndryshme nga tekstet e vjetra të realizuara në Shqipëri, duke shtuar se mbeten të pakrahasueshme në cilësi.

G.D/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.