Teliti: Turizmi në pikë të hallit. Në kulmin e sezonit, në rastin më të mirë me 50 % të kapacitetit
Partia Demokratike shpreh shqetësimin për gjendjen në të cilën ndodhet sektori i turizmit në Shqipëri. Sipas Dorian Telitit, në kulmin e sezonit fluksi i turistëve arrin në rastin më të mirë në 50 % të kapacitetit të saj dhe kjo vetëm në fundjavë.
“Qeveria shqiptare vazhdon të mos dëgjoje thirrjet e shumta të biznesit dhe braktisja që i bën ekonomisë, bujqësisë, sektorit prodhues, turizmit, etj, po na kushton shumë rëndë” deklaron Teliti.
Sipas tij, nuk nevojitet thjesht një rotacion politik, por nevojitet ndryshim rrënjësor, një filozofi e re qeverisjeje. Ai evidenton se Partia Demokratike dhe Opozita e Bashkuar e kanë të qartë që sfidat janë të mëdha dhe me ekipin më të mirë të ekspertëve vendas dhe të huaj po punohet intensivisht për t’i dhënë shqiptarëve alternativën që do të rigjallërojë ekonominë dhe turizmin shqiptar.
Deklarata e plotë:
Turizmi në pikë të hallit, strukturat hoteliere të braktisura dhe pa mbështetje në ditët e tyre më të vështira. Në kulmin e sezonit, fluksi i turistëve arrin në rastin më të mirë deri në 50% të kapacitetit të saj, dhe kjo vetëm në fundjavë.
Sektori i turizmit përfaqëson 1/5 e ekonomisë shqiptare, ku e kanë lidhur fatin e tyre mbi 300 mijë shqiptarë, sipërmarrës, të punësuar drejtpërsëdrejti apo tërthorazi në prodhim, furnizim, shërbime, transport, etj.
Pas dëmeve të shkaktuara nga tërmeti i 26 nëntorit, goditjen më të madhe ky sektor e ka marrë gjatë këtyre muajve të pandemisë. Ndihma shtetërore praktikisht ishte dhe mbetet edhe sot që flasim inekzistente. Në 5 muaj qeveria shqiptare ka dhënë vetëm 3.6 milione euro mbështetje nga dy paketat e saj qesharake, asnjë qindarkë më shumë, ndërkohë që vetëm PPP e Inceneratorit të Tiranës ka marrë 3.9 milionë euro gjatë kësaj periudhe.
Garancia sovrane për pagat e punonjësve nuk dha rezultat, pasi mund të merrej vetëm për periudhën mars-maj 2020, periudhë gjatë së cilës këto struktura ishin terësisht të mbyllura dhe pa aktivitet.
Vendet e fqinje, ndryshe nga Shqipëria, përveç politika të tjera mbështetëse, kanë ndërmarrë paketa stimuluese konkrete për turizmin.
Maqedonia e Veriut: bonus 150 euro për çdo punonjës të vendit me pagë deri në 250 euro, janë 150 euro bonus për t’i përdorur në strukturat hoteliere dhe restorantet. Gjithashtu bonus shtesë prej 900 euro për çdo punonjës të sektorit të turizmit dhe transportit.
Mali i Zi: ndërmori paketën e tretë ekonomike, paketë prej 1.2 miliardë euro, ku gjysma e saj i dedikohet sektorit të turizmit.
Italia: 300 deri në 500 euro bonus për person për konsum në strukturat hoteliere dhe restorantet.
Mjaftojnë këto shembuj për të treguar qartë ç’do të thotë të ndihmosh dhe stimulosh një sektor.
Qeveria shqiptare vazhdon të mos dëgjoje thirrjet e shumta të biznesit dhe braktisja që i bën ekonomisë, bujqësisë, sektorit prodhues, turizmit, etj, po na kushton shumë rëndë.
Nuk nevojitet thjesht një rotacion politik, por nevojitet ndryshim rrënjësor, një filozofi e re qeverisjeje, ku në qendër të vëmendjes nuk janë miqtë dhe shokët oligarkë, por janë shqiptarët e thjeshtë dhe biznesi të zhvillohet në një klimë pozitive, me taksa të ulëta, procedura të thjeshtuara, konkurencë të lirë e të ndershme, subvencione dhe paketa stimuluese për të mbështetur sektorët e saj.
Partia Demokratike dhe Opozita e Bashkuar e kanë të qartë që sfidat janë të mëdha dhe me ekipin më të mirë të ekspertëve vendas dhe të huaj po punohet intensivisht për t’i dhënë shqiptarëve alternativën që do të rigjallërojë ekonominë dhe turizmin shqiptar.
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.