Temperatura të larta në disa zona të SHBA – Arrijnë rekordin prej rreth 40 gradë celsius
Më shumë se 60 milionë amerikanë në veriperëndim të Paqësorit dhe në juglindje të SHBA u përballën me temperaturat deri në 40 gradë celcius dhe temperaturat pothuajse rekord arritën në Idaho dhe Uashington.
Temperatura në Spokane, pranë Uashingtonit, mund të kalojë edhe 40° C, sipas meteorologëve dhe banorët e moshuar të qytetit janë në rrezik nga këto temperature.
“E gjithë kjo nxehtësi është shumë e pazakontë … zakonisht temperatura më e lartë këtu është rreth 36 gradë, por kjo është përvëluese, shumë përvëluese”, tha një banore 80-vjeçare e Spokane.
Temperatura të larta prekën pjesën veriperëndimore të Paqësorit muajin e kaluar, kur një valë e nxehtësisë mori jetën e qindra personave dhe paralizoi një rajon të mësuar me verë të butë dhe ku shumë banorë nuk kanë ajër të kondicionuar.
Qytetet Portland dhe Salem në Oregon dhe Seattle në Uashington vendosën rekorde të reja të temperaturës në mbi 42 gradë celcius në fund të qershorit.
Një studim i publikuar në fillim të këtij muaji tregoi se vala shkatërruese e të nxehtit në rajonit do të ishte “praktikisht e pamundur” pa ndikimin e ndryshimit të klimës.
Valë të tilla rekorde të nxehtësisë mund të bëhen dy deri në shtatë herë më të shpeshta në të gjithë botën gjatë dekadave të ardhshme, zbuluan shkencëtarët në një studim tjetër të publikuar këtë muaj.
Ndërsa valët e nxehtësisë në stinën e verës janë më të zakonshme në SHBA-në Juglindore, Shërbimi Kombëtar i Motit paralajmëroi se indeksi i lartë i nxehtësisë, një efekt i kombinuar i temperaturës së lartë dhe lagështisë, mund të çojë në situate të rrezikshme.
“Nxehtësia dhe lagështia ekstreme do të rrisë ndjeshëm potencialin për sëmundje të lidhura me vapën, veçanërisht për ata që punojnë, ose marrin pjesë në aktivitete në natyrë,” tha zyra e Shërbimit Kombëtar të Motit në Alabama.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.