Tendenca e 2017 krahasuar me 2016/ Po shtohen hyrjet për pushime e po ulen ndjeshëm ato për vizita ditore (Tabela me shifrat)

Numri i vizitorëve të huaj, të hyrë në Shqipëri për qëllime pushimi dhe vizita ditore në muajin Qershor 2017, rezulton 207.972, ndërsa në Qershor 2016 ky numër ishte 182.606 duke shënuar një rritje me rreth 13,9 %. Shifrat janë publikuar në raportin e fundit të INSTAT.

Nëse analizojmë të dhënat, rezulton se hyrjet e shtetasve të huaj për qëllime pushimesh ka shënuar një rritje të ndjeshme krahasuar me të njëjtën periudhë të një viti më parë. Konkretisht, në qershor 2017 numri i shtetasve të huaj që ka hyrë në Shqipëri është 195.048. në qershor të vitit të kaluar, numri ishte 97.012.

Ndryshe nga sa ka ndodhur me hyrjet e shtetasve të huaj për qëllime pushime ku rritja është e dukshme, vizitat ditore kanë shënuar rënie të ndjeshme. Referuar të dhënave të INSTAT, rezulton se numri i shtetasve të huaj që kanë hyrë për vizitë ditore është 12.924. Ndërkohë, në qershor të vitit të kaluar numri ishte 85.594.

Nëse analizojmë të dhënat, rezulton gjithashtu një përgjysmim i hyrjeve të shtetasve të huaj për vizitë te miqtë e të afërmit. Në qershor të 2016 janë shënuar 2.282 hyrje ndërsa në qershor 2017, 1.038 hyrje.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.