Tender për ankesat e bizneseve për tenderat! Zgjerohet sistemi dhe përfshihen proceset e brendshme administrative

Agjencia Kombëtare e Shoqërisë së Informacionit ka shpallur një tender me fond limit 25 milionë lekë për përmirësimin e zgjerimin e sistemit të ankesave për Komisionin e Prokurimeve Publike.

Aktualisht Komisioni i Prokurimit Publik ka në dispozicion sistemin e menaxhimit të ankesave, e-Ankesa.

Sistemi ofron mundësinë që me anë të platformës unike qeveritare E-Albania të gjithë operatorët ekonomikë vendas dhe të huaj të dorëzojnë pa kosto shtesë ankesa për procedura prokurimi, koncesioni, ankandi, leje minerare pranë autoriteteve kontraktore dhe Komisionit të Prokurimit Publik, raporton SCAN.

Sistemi mënjanon terësisht kontaktin e çdo biznesi me çdo zyrë shteti, përfshirë KPP dhe përmbyll ciklin e zhvillimit terësisht elektronik të procedurave të prokurimit publik.

Objektivi i përgjithshëm i këtij projekti të ri është zgjerimi i sistemit e-Ankesa duke përfshirë menaxhimin e proceseve të brendshme administrative, menaxhimin buxhetor-financiar, menaxhimin e çështjeve gjyqësore (gjurmimin e statusit të çështjeve), menaxhimin e procesit të rekrutimit dhe listëpagesave të punonjesve, menaxhimin elektronik të seancave dëgjimore, si edhe pajisjet fizike mbështetëse për të finalizuar këtë objektiv.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.