Tendera abuzive dhe jashtë kritereve – Auditi i financave nxjerr “zbuluar” ministritë, dëmi në buxhet 7.3 milionë euro

Ministritë kanë abuzuar në dhënien e tenderave, duke shkelur me “të dyja këmbët” legjislacionin në fuqi dhe duke bërë favorizime sipas rasteve. Raporti i auditimit i publikuar së fundmi nga Ministria e Financave, i zbardhur nga TV SCAN, hedh dritë mbi shkeljet më të mëdha të bërë në fushën e prokurimeve gjatë vitit 2019.

Sipas raportit të fjalë, audituesit e brendshëm kanë konstatuar  shkelje të procedurave të prokurimit publik përfshirë specifikimet teknike, procedurat e tenderimit, si dhe zbatimi i kontratave; Nënshkrim të kontratës duke ndryshuar kriteret e përcaktuara në dokumentat e tenderit me të cilat është shpallur fitues subjekti; Mos argumentim të plotë të fondi limit, si bazë për fillimin e procedurave të prokurimit; Mos ndjekjen e të gjithë hapave ligjorë për blerjet me vlera të vogla, si dhe favorizimi në disa raste të blerjeve të të njëjtit operator ekonomik; apo mos argumentim dhe mbështetje me kërkesat dhe nevojat e njësisë në planifikimin për mallra/shërbime, si dhe përllogaritjen e fondit limit.

Sipas raportit, si rezultat i auditimeve të ushtruara gjatë vitit 2019 janë identifikuar shkelje të disiplinës financiare të cilat kanë shkaktuar efekt financiar negativ në Buxhetin e Shtetit prej afro 7.3 milionë euro në sisteme të ndryshme si: prokurimi publik, paga dhe shpërblime, tatime dhe taksa, koncesione dhe administrimin e pronës shtetërore, ku dëmi më i madh është në fushën e tenderave me afro 1.5 milionë euro.

Elisabeta Dosku / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.