Tenderë 160 milionë lekë për eficencën e energjisë – Reduktimi i konsumit/ Projekti pilot përfshin 20 qytete, ndërhyrje termoizoluese në 2 prej tyre
Me një fond limit prej 160 mln lekësh, Agjencia e Eficencës së Energjisë ka hapur disa tenderë që kanë në fokus auditimin energjetik të ndërtesave, në disa qytete të vendit, teksa në 2 prej tyre parashikohen edhe punimet termoizoluese, me qëllim reduktimin e konsumit të energjisë.
Në total janë 20 qytete, ku parashikohet të kryhet auditimi i ndërtesave shumë familje të ndërtuara përpara viteve ’90, duke nisur nga Shkodra, Malësia e Madhe, Kukësi, Elbasani, Fieri, Durrësi, etj. Ndërkohë që, Tepelena dhe Korça janë 2 qytetet, ku përveç auditimit do të kryen edhe ndërhyrjet konkrete me qëllim kursimin e energjisë. Sipas dokumenteve të tenderit, në Tepelenë janë 5 pallate ekzistues, ku do të ndërhyhet, ndërsa në Korçë do të jenë 3 ndërtesa.
Agjencia e Eficencës së Energjisë argumenton se kërkesa për energji për stokun e ndërtesave në Shqipëri përbën një sfidë të veçantë, duke shtuar se në vitin 2017, konsumi përfundimtar i energjisë në sektorin e ndërtesave private dhe publike së bashku, ishte përgjegjës për 70% të sasisë së energjisë elektrike në konsumin përfundimtar të energjisë.
“Në këtë kuadër, duke parë peshën e madhe që ka konsumi i stokut të ndërtesave në vend, projektet konkrete ku investohet në eficencën e energjisë janë të një rëndësie të veçantë”,-thuhet ndër të tjera në dokumentet e tenderit. Investimi në termoizolim, është një nga rekomandimet që japin ekspertët për reduktimin e konsumit të energjisë, duke siguruar jo vetëm përfitime financiare, por edhe një jetesë komode për qytetarët.
Hapja e këtyre tenderëve vjen në një kohë kur qeveria ka deklaruar se parashikon të kërkojë rritjen e çmimit të energjisë për ato familje që konsumojnë mbi 700 kwh/në muaj, si një formë për të kursyer energjinë.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.