“Tenderët e rindërtimit, në Kushtetuese” – Ligji special, Brahaj: Kompanive iu lihet vetëm 10 ditë kohë, fituesit zgjidhen në tavolinë
Instituti Shqiptar i Shkencës e konsideron antikushtetues ligjin special me të cilin zhvillohen procedurat tenderuese për programin e rindërtimit. Drejtorja Ekzekutive, Aranita Brahaj thotë se tashmë kanë depozituar edhe padinë në Gjykatën Kushtetuese, ndërsa thekson se hapat e ndjekur deri më tani kufizojnë pjesëmarrjen e kompanive të huaja në garë.
Po ashtu, sipas Brahajt pavarësisht se procedurat e prokurimit publik fillojnë në sistemin elektronik, ato mbyllen në tavolinat e autoriteteve prokurues, që në këtë rast janë Fondi Shqiptar I Zhvillimit apo disa prej bashkive të autorizuara.
Deklaratat e Brahajt u bënë gjatë një tryeze të përbashkët diskutimi me median, organizatat e shoqërisë civile dhe Komisionin për Integrimin Evropian, ku u prezantua projekti “Përmirësimi i Debatit të Politikave dhe Llogaridhënies në Përmbushjen e Grupit të Parë të Kapitujve Negociues”, që mbështetet nga Ambasada e Mbretërisë së Vendeve të Ulta në Tiranë.
Objektivi i përgjithshëm i projektit është të mbështesë procesin e negociatave të pranimit të Shqipërisë në BE lidhur me Grupin e Parë të Kapitujve Negociues (Cluster 1), përmes përmirësimit të debatit të politikave, forcimit të llogaridhënies dhe rolit të OSHC-ve në proces.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.