Terapi e re për diabetin: Trupi tani është në gjendje të rregullojë vetë nivelet e sheqerit në gjak!
Një terapi eksperimentale e diabetit të tipit 1 duket se ka funksionuar tek pacienti i parë që e mori atë, por është ende herët për të kënduar fitoren.
Brian Shelton, një 64-vjeçar amerikan që vuan nga diabeti i tipit 1, është personi i parë në botë që i është nënshtruar një terapie eksperimentale të zhvilluar nga Doug Melton, një biolog në Universitetin e Harvardit: në rastin e tij specifik, falë infuzionit të qelizave (të zhvilluara nga qelizat staminale) që simulojnë ato të pankreasit dhe prodhojnë insulinë, duket se trupi tani është në gjendje të rregullojë vetë nivelet e sheqerit në gjak. Lajmi, i raportuar nga New York Times, ka ngjallur në mënyrë të pashmangshme entuziazëm dhe shpresa, por ekspertët frenohen: të dhënat e para për eksperimentin janë premtuese, por studimet nuk kanë përfunduar dhe as i janë nënshtruar ende rishikimit – domethënë të verifikuara nga ekspertë që nuk janë të përfshirë në hulumtim.
U deshën njëzet vjet dhe 50 milionë dollarë për të qenë në gjendje të konvertonin qelizat staminale në pankreatike dhe pesë vjet të tjera për të kuptuar se si t’i prodhonin ato në sasi të mëdha me një metodë lehtësisht të riprodhueshme. Deri më tani, e vetmja mënyrë që një person me diabet të tipit 1 t’i thoshte lamtumirë vaksinave të insulinës ishte të merrte një transplant të qelizave pankreatike (të quajtur insulare), por mungesa e donatorëve e bën këtë një shpresë të largët për shumicën e të sëmurëve.
Vertex Pharmaceuticals e ka marrë sfidën në dorë dhe studimet vazhdojnë: ato do të zgjasin edhe pesë vjet të tjera dhe do të përfshijnë 17 vullnetarë me diabet të rëndë të tipit 1. Kompania ende nuk ka bërë të ditur koston e trajtimit, e cila ka të ngjarë të jetë mjaft e lartë.
Pas trajtimit, Shelton nuk do t’i nënshtrohet më injeksioneve të insulinës, por do t’i duhet të marrë ilaçe imunosupresive për pjesën tjetër të jetës së tij që pengojnë sistemin e tij imunitar të refuzojë qelizat e injektuara. Në këtë drejtim, “ne duhet të vlerësojmë me kujdes marrëdhënien rrezik-përfitim midis sëmundjes dhe komplikimeve të mundshme që mund të rrjedhin nga barnat imunosupresive”, paralajmëron John Buse, një diabetolog në Universitetin e Karolinës së Veriut. Focus
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.