Tërheqja e SHBA nga OBSH. Do të transferojë fondet tek kontribute të tjera të OKB
Departamenti Amerikan i Shtetit bëri të ditur se Washingtoni do të transferojë financimin e Organizatës Botërore të Shëndetësisë tek kontribute të tjera të Organizatës së Kombeve të Bashkuara. Washingtoni do të reduktojë angazhimin tek Organizata Botërore e Shëndetësisë deri në Korrik 2021, duke tërhequr ekspertët e Departamentit të Shëndetësisë dhe Shërbimeve Njerëzore nga selia e Organizatës Botërore të Shëndetësisë.
Nerissa Cook, zv/sekretare për Byronë e Çështjeve të Organizatave Ndërkombëtare, detajoi se pjesa e mbetur e kontributeve të vitit 2020 për Organizatën e Kombeve të Bashkuara, prej rreth 62 milionë dollarë, së bashku me 19 milionë dollarë që Washingtoni detyrohet organizatës për vitin fiskal 2019, do të riprogramohen ndaj Kombeve të Bashkuara për të paguar detyrimet e rregullta të Organizatës.
Shtetet e Bashkuara dorëzuan në muajin Korrik njoftimin për t’u tërhequr nga Organizata Botërore e Shëndetësisë tek sekretari i përgjithshëm i Kombeve të Bashkuara dhe tërheqja bëhet efektive më 6 Korrik 2021. Presidenti Donald Trump dhe administrata e tij, kanë kritikuar prej kohësh Organizatën. Ekspertët dhe demokratët kanë thënë se administrata e Trump po përpiqet të shmang fajin e trajtimit të dobët të Covid-19 dhe se veprimi do të ishte kundërproduktiv ndaj krizës së shëndetit publik.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.