Tërhiqen çmimet e naftës – Shqetëson kërkesa në Kinë dhe prodhimi i fortë në SHBA
Çmimet e naftës u regjistruan në rënie për sesionin e parë tregtar të kësaj Jave, ndërkohë që ngadalësimi në rafineritë kineze rriti shqetësimet mbi kërkesën në konsumatorin e dytë më të madh në botë.
Nga ana tjetër, zgjerimi i kapacitetit nxjerrës në SHBA, mund të shtojë tepricën globale. Rafineritë kineze kanë procesuar rreth 10.71 milionë fuçi në ditë për muajin Korrik, raportoi Zyra Kombëtare e Statistikave, shifër në rënie me 500 mijë fuçi nga muajin Qershor.
Analistët thanë se kjo mund të dobësojë kërkesën kineze për naftë. Në hapje të sesionit tregtar, nafta Brent e Londrës kuotohej në 51.8 dollarë për fuçi, ndërsa ajo bruto amerikane (WTI) në 48.6 dollarë.
Investitorët e arit të zi ishin gjithashtu në vëzhgim të të dhënave në SHBA, që treguan se eksploruesit kanë rritur kapacitetin e nxjerrjes.
Teprica në treg është përkeqësuar edhe nga rritja e prodhimit në Libi, vend i OPEC që është përjashtuar nga plani për reduktimin e prodhimit.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.