Tërmetet dhe përmbytjet, sektorë në çdo ministri – Këshilli i Ministrave krijon zyrat e posaçme për mbrojtjen nga fatkeqësitë
Çdo Ministri që mbulon drejtpërdrejtë kompetenca që kanë të bëjnë me mbrojtjen apo parandalimin e fatkeqësive natyrore do kenë në përbërje struktura të posaçme për këtë funksion, ndërkohë që të tjerat do kenë 1 ose 2 pozicione pune të dedikuar mbrojtjes civile. Përmes një vendimi të publikuar këtë fundjave, Këshilli I Ministrave ka vendosur që në ministritë e linjës krijohen pozicione pune apo sektorë për zvogëlimin e riskut nga fatkeqësitë dhe mbrojtjen civile, bazuar në specifikat, fushën e përgjegjësisë shtetërore dhe kompetencat e secilës ministri.
Përbërja e njësive organizative, që kanë në kompetencë të tyre çështjet e mbrojtjes civile, është si më poshtë vijon: a) në ministritë përgjegjëse për mbrojtjen civile, mbrojtjen, punët e brendshme, transportin, infrastrukturën, bujqësinë, shëndetësinë, energjetikën, arsimin, mjedisin dhe kulturën, për arsye të përgjegjësive të shtuara në lidhje me mbrojtjen civile, në nivel sektori; b)në ministritë e tjera të jetë 1 apo 2 pozicione në përbërje të njësive të tjera organizative, pjesë të strukturave përgjegjëse për shërbimet e brendshme mbështetëse.
Njësitë organizative, që kanë në kompetencë të tyre çështjet e mbrojtjes civile, kanë këto detyra kryesore: a) hartimin dhe përditësimin e planit për emergjencat civile, sipas fushës së përgjegjësisë shtetërore të ministrisë së linjës; b) në bashkëpunim me strukturat përgjegjësepër hartimin e projektbuxhetit vjetor dhe atij afatmesëm, përgatitjen e projektbuxhetit për zvogëlimin e riskut nga fatkeqësitë dhe mbrojtjen civile, si zë më vete në buxhetin e ministrisë; c) organizimin dhe bashkërendimin e punës përmirëmbajtjen e sistemit të monitorimit, të paralajmërimit të hershëm, të njoftimit dhe të alarmit në fushën e veprimtarisë së ministrisë;
bashkëpunimin me strukturat e tjera përgjegjëse të ministrisë për vlerësimin e dëmeve dhe humbjeve nga fatkeqësitë; deri dhe koordinimin dhe bashkërendimin e veprimtarisë me strukturat e tjera përgjegjëse të ministrisë për zvogëlimin e risqeve nga fatkeqësitë dhe kufizimin e atyre që mund të krijohen si pasojë e veprimtarisë së institucionit.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.