Tërmetet, kontratat me ndërtuesit – Del vendimi, si do llogaritet tarifa vjetore e totali i policës së sigurimit, 0.1% e shumës
Kontratat 10-vjeçare të sigurimit të banesave, të paralajmëruara nga Kryeministri pas tërmetit të 21 shtatorit, do t;i dorëzohen blerësve në momentin shitjes nga ana e ndërtuesit dhe do të kenë efekt nga momenti i nisjes së punimeve. Përmes një vendimi të miratuar më 2 nëntor, Këshilli i Ministrave ka miratuar mënyrën si do lidhen kontratat e sigurimit dhe llogaritjen e tarifave të tyre. Vendimi përcakton se “Ndërtuesi/ zhvilluesi/ investitori i dorëzon blerësit, njëkohësisht me lidhjen e kontratës për kalimin e pronësisë së ndërtesës, një kontratë sigurimi me afat 10- (dhjetë-) vjeçar me përfitues blerësin/ blerësit dhe me efekt nga data e përfundimit të punimeve.
Kjo kontratë sigurimi mbulon dëmet e ndërtesës, që shfaqen pas lidhjes së kontratës së kalimit të pronësisë, përfshirë dëmet ndaj të tretëve, që rrjedhin kur, për shkak të tokës ose për defekt të ndërtimit, ndërtimi shembet tërësisht ose pjesërisht, ose paraqet rrezik të dukshëm shembjeje ose defekte të tjera të rënda.
Limiti i përgjegjësisë së kontratës së sigurimit nuk duhet të jetë më i ulët se vlera totale e çmimit të shitjes të përcaktuar në kontratën e kalimit të pronësisë së pasurisë paluajtshme.
Tarifa vjetore e primit të sigurimit nuk mundtë jetë më e ulët se 0.1 (zero pikë një) për qind e shumës së sigurimit/limit të përgjegjësisë së përcaktuar në kontratën e sigurimit. Vendimi ngarkon Noterët me detyrimin të lidhin kontratën për kalimin e pronësisë së ndërtesës nga ndërtuesi/ zhvilluesi/ investitori tek blerësi, shoqëruar me kontratën e sigurimit 10- (dhjetë-) vjeçar në favor të blerësit/ blerësve të kryer nga shitësi.
Ndërkaq, kërkesa për regjistrim në regjistrin e pasurive të paluajtshme të kontratave të kalimit të pronësisë së ndërtesës nga ndërtuesi/zhvilluesi/investitori te blerësi, shoqërohet edhe me kontratën e sigurimit 10- (dhjetë-) vjeçar në favor të blerësit/blerësve, të kryer nga ndërtuesi/ zhvilluesi/ investitori. Në rast mungese të kontratës së sigurimit, kërkesa për regjistrim të kontratës së kalimit të pronësisë nuk administrohet nga sporteli i shërbimeve kadastrale, përcakton vendimi i Qeverisë.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.