Tërmeti, 1 vit qira për familjet – Veliaj: Na jepni kohë për të marrë vendime për banesat e pabanueshme
Bashkia e Tiranës do të ofrojë qira 1-vjeçare për çdo familje, të cilës do t’i prishet pallati për shkak të dëmeve të shkaktuara nga tërmeti i 26 nëntorit. Teksa inspektoi prishjen e shkollës së dëmtuar në Pezë, kryebashkiaku Erion Veliaj tha se ky është një mekanizëm që jep kohë për gjetjen e zgjidhjeve afatgjata për ndërtesat e pabanueshme.
“Për të gjitha pallatet që do të shpallen të pabanueshme, Këshilli Bashkiak do të miratojë një qira 1-vjeçare, që të sigurohemi që secili ka një strehë të sigurt mbi kokë, që jeta fillon normalisht, që do të ecim përpara dhe rikuperojmë nga e gjithë kjo fatkeqësi; ama, që të na japi edhe kohë 1 vit, që të vendosim se çfarë do bëjmë me këto ndërtesa të pabanueshme”, shtoi Veliaj.
Sipas Veliajt, për rastet kur dëmtimet janë të lehta dhe nuk kanë prekur strukturën mbajtëse do të behet rikonstruksioni, ndërsa për rastet kur kjo është e pamundur për shkak të dëmtimeve të rënda do të bëhet rindërtimi nga e para.
“Ku mund të bëjmë rikonstruksion, do bëjmë rikonstruksion; ku do të duhet që t’i bëjmë të reja, do t’i bëjmë të reja; ku do të duhet që, ndoshta të mos punojmë fare më në atë zonë, do të duhet që të blejmë apartamente, ose të gjemë skema të tjera të strehimit në Tiranë. E rëndësishme është që të ngrihemi më të fortë seç ishim në këto ditët e fatkeqësisë, duke filluar nga rindërtimi i shkollave, deri tek rindërtimi i banesës për çdo qytetar të Tiranës, që sheh te qyteti dhe shteti i tij një mundësi për të rikuperuar nga gjithë kjo tragjedi, jo e vogël që na ngjau”.
Ndërkaq, sikurse në Durrës e Thumanë, ndërtesat që kanë rrezik shembje do të prishen.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.