Terror në Manchester – Dhjetëra viktima dhe të plagosur. MPJ: Nuk ka shqiptarë

Britania është goditur nga sulmi më i përgjakshëm terrorist që prej vitit 2005. Në një koncert popi në Manchester, një akt i dyshuar kamikaz ka lënë të paktën 20 viktima, dhe dhjetëra të tjerë të plagosur.

Bilanci i viktimave, fatkeqësisht është i destinuar që të rritet, për shkak se mes të plagosurve një pjesë e tyre është në gjendje të rëndë, ndërkohë që ka edhe të humbur.

Pjesa dërrmuese e viktimave dhe të plagosurve janë adoleshentë dhe madje edhe fëmijë. Koncerti ku ka ndodhur edhe sulmi zhvillohej në hapësirën më të madhe të mbyllur në Europë për evente të tilla, me një kapacitet prej thuajse 22 mijë personash.

Autoritetet britanike bëjnë me dije se, dyshohet për një sulm kamikaz të kryer nga një person i vetëm, paçka se hetimet janë ende në fazën fillestare. Autoritete amerikane nga ana tjetër bëjnë një paralele me ngjarjet në teatrin Bataclan të Parisit në nëntor të vitit 2015.

Ministria e Jashtme e Shqipërisë, bën me dije se, nga informacionet paraprake, nuk ka asnjë shqiptar të përfshirë në këtë sulm. Ndër të tjera, Ministria e Jashtme ka shprehur ngushëllimet e rastit.

Reagime ka pasur edhe nga institucioni i Presidencës dhe ai i Kuvendit të Republikës së Shqipërisë.

Sulmi tronditës i Manchesterit ka shkaktuar reagime të kufizuara tregjet financiare. Paundi ka rrëshqitur ndjeshëm, ndërkohë që çuditërisht tregjet europiane kanë vijuar performancën pozitive. Monedha e përbashkët europiane është treguar indiferente, duke prekur madje nivelin më të lartë në 6 muaj.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.