Tesla ikën në Kinë – Gati marrëveshja, fabrikë prodhimi në Shangai

Tesla dhe Kina janë shumë pranë një marrëveshjeje dypalëshe. Kjo marrëveshje do të spostojë disa njësi të prodhimit të makinave Tesla në Kinë.

Kompania e Elon Musk kërkon kështu të reduktojë kostot e prodhimit ndërkohë që Pekini kërkon që të konfirmohet si vendi lider në teknologjinë e gjelbër.

Marrëveshja do të firmoset me autoritetet e Shanghait, ku edhe do të vendoset fabrika e re. Kjo njësi do të prodhojë makinat elektrike të luksit.

Për Teslan ky është një hap mjaft i rëndësishëm pasi do t’i jepte akses më të gjerë në tregun global.

Për të firmosur marrëveshjen, kompanisë së Elon Musk i mungon vetëm një partner lokal, që do ti mundësojë akses më të shpejtë në treg. Ky bashkëpunim do të bëhet në formën e një joint venture.

Gjatë vitit të kaluar, të ardhurat e Tesla nga Kina u trefishuan, në më shumë se 1 miliard dollarë. Vendosja e një linje prodhimi në vend jo vetëm që do të rrisë këto të ardhura por do ti kursejë kompanisë taksën prej 25% që aktualisht paguan në shtetet e bashkuara.

Kina ndërkohë është tregu numër një në botë i makinave që nuk ndotin.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.