Testet me raketën që duhet të na kthejë në Hënë vitin e ardhshëm nuk po ecin shumë mirë!
Nuk po shkon mirë testi përfundimtar i raketës NASA SLS (Space Launch System), e cila në maj (sipas planeve të mëparshme) ishte menduar të nisej për në Hënë për një test të rëndësishëm pa pilot, në funksion të nisjes së parë me astronautë rreth Hënës që duhet të ndodhte (ose, në këtë pikë, duhet të kishte ndodhur) në 2023.
Javën e kaluar raketa që do t’i japë jetë misionit të quajtur Artemis 1 u dërgua në pikën e lëshimit për testin përfundimtar që konsiston në mbushjen e rezervuarëve të raketës dhe kryerjen e procedurave që i paraprijnë lëshimit aktual. Me fjalë të tjera, duhet të kishte numëruar mbrapsht deri në momentin e fundit, por pa ndezur motorët.
Testi ishte planifikuar nga fundi i së dielës 3 prill dhe orët e para të 4 prillit dhe duhej të përfundonte me kthimin e raketës në hangar, për kontrollet e nevojshme. Të dielën, megjithatë, numërimi i simuluar mbrapsht u bllokua për shkak të një problemi me platformën e nisjes. Më saktësisht, ka pasur një mosfunksionim në ventilatorët që shpërndajnë gazrat që ikin nga raketa. Në fakt është e nevojshme të shmanget akumulimi i këtyre gazrave në bazën e raketës, sepse në kushte të caktuara mund të shkaktohet një zjarr. Prandaj testi u pezullua dhe u shty për ditën e nesërme, në pritje të zgjidhjes së problemit, i cili ka ndodhur ndërkohë.
Kështu të hënën e datës 4 prill, pasi rrufeja goditi platformën e lëshimit pa asnjë pasojë, testet rifilluan, por në këtë pikë pati një problem me sistemin që shërben për të ftohur oksigjenin për ta bërë atë të lëngshëm. Kjo çështje shkaktoi vonesa të mëtejshme, por përfundimisht u zgjidh gjithashtu.
Por si të mos mjaftonte kjo, një valvul ventilimi në skenën qendrore u mbërthye ndërsa mbushte rezervuarin e raketës. Është një valvul e cila ka për detyrë të lehtësojë presionin e stadit qendror gjatë mbushjes me oksigjen. Nëse nuk funksiononte, kjo do të çonte në rrezikun e një shpërthimi. Pra, një ndalesë më shumë.
Aktualisht (mëngjesin e së martës 5 prill në Itali) teknikët janë ende duke luftuar për zgjidhjen e këtij problemi. Numërimi mbrapsht është rikthyer në -43 orë nga “nisja”: për momentin duket se, pasi të jetë gjetur zgjidhja, testi duhet të rifillojë nga kjo pikë (por nuk është konfirmuar).
Ndërkohë, këto shqetësime kanë shkaktuar tashmë një vonesë në nisjen e misionit të parë krejtësisht privat në Stacionin Ndërkombëtar të Hapësirës, Axiom-1, i planifikuar fillimisht për 6 prill dhe tani shtyrë për në 8. Shpresa është që të mos ketë vonesa të tjera, sepse një shtyrje e mëtejshme e këtij misioni mund të rezultojë në një vonesë të mëtejshme për nisjen e Crew-4. FCS
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.